Jańa ıntellektýaldy lokasııa «Qoljetimdi kitaphanalar» baǵdarlamasy aıasynda oryndaldy. Joba bilim berý ortasyn sıfrlyq transformasııalaýdyń jarqyn úlgisine aınaldy. Buǵan deıin mundaı tehnologııalar tek qalalyq deńgeıde ǵana qoldanylsa, endi ınnovasııalyq standart ýnıversıtete bilim alyp júrgen stýdentter men oqytýshylar úshin qoljetimdi bolmaq, dep habarlaıdy Egemen.kz.
Almatyda Abylaı han atyndaǵy Qazaq halyqaralyq qatynastar jáne álem tilderi ýnıversıtetinde tolyq avtomattandyrylǵan qyzmet kórsetý kitaphanasy ashyldy. О́zine-ózi qyzmet kórsetetin Qazaqstandaǵy alǵashqy joǵary oqý ornyndaǵy zamanaýı formatta jumys isteıtin kitaphana alǵashqy oqyrmandardyń tapsyryn qabyldady.
Búginde Almaty qalasy avtonomdy kitaphana stansalaryn engizý boıynsha kósh bastap tur. Megapolıste osyndaı 26 júıe jumys istep jatyr. Degenmen, bul tájirıbeni ýnıversıtettik ortaǵa engizý joǵary bilim berý tarıhyn jańǵyrtty deýge bolady.
Avtomattandyrylǵan stansııa bilim alý prosesin qolaıly ári jyldam oryndaýǵa baǵyttalǵan. Eger klassıkalyq abonement jumys kestesine táýeldi bolsa, jańa júıe kitapty sanaýly sekýndtar ishinde alýǵa nemese qaıtarýǵa múmkindik beredi. Ol úshin paıdalanýshyǵa jeke oqyrman bıletin qoldaný jetkilikti. Júıe ádebıetti birden anyqtap, derekterdi oqyrmannyń sıfrlyq profılinde jańartady.
Kitaphananyń ashylýynda Abylaı han atyndaǵy QazHQjÁTÝ rektory, akademık Sálıma Qunanbaeva: «Búgin ýnıversıtet Memleket basshysy alǵa qoıǵan bilim berýdi sıfrlandyrý mindetterin iske asyrý jolynda mańyzdy qadam jasady. Elimizdegi joǵary oqý oryndary arasynda alǵash ret avtomattandyrylǵan kitaphananyń ashylýy jaı ǵana ınfraqurylymdy jańartý emes, bilim tutyný mádenıetiniń túbegeıli ózgerýi. Biz stýdentter úshin zamanaýı tehnologııalar akademııalyq erkindik pen álemdik resýrstarǵa qoljetimdilikti qamtamasyz etetin ıntellektýaldy ekojúıe qurýǵa umtylamyz. О́zine-ózi qyzmet kórsetý kitaphanasy ýnıversıtetimizdiń ashyqtyǵy, senim men ınnovasııalyq damý baǵytynyń sımvoly», dep jańa júıeniń strategııalyq mańyzyn atap ótti.
Joba kitap qoryn paıdalaný úrdisin ońtaılandyryp qoımastan, zamanaýı jáne ıntýıtıvti formattar arqyly jastardyń oqýǵa degen qyzyǵýshylyǵyn arttyrady. Kitapty tegin paıdalanýmen tehnologııalyq múmkindikter stansasy ýnıversıtettegi eń tartymdy ortalyqqa aınalary sózsiz. О́zine-ózi qyzmet kórsetý kitaphanasy oqý prosesi men ǵylymı-zertteý qyzmetin qoldaýdyń mańyzdy quralyna aınalyp, joǵary oqý ornynyń ınnovasııalyq bilim berý ortalyǵy retindegi bedelin nyǵaıta túsedi.