Búgin Májilistiń jalpy otyrysynda ekonomıkalyq reforma jáne óńirlik damý komıtetiniń múshesi Nıkıta Shatalov «Týrızm salasyn qoldaý máseleleri boıynsha keıbir zańnamalyq aktilerine ózgerister men tolyqtyrýlar engizý týraly» zań jobasy jóninde baıandama jasady. Búgin ekinshi oqylymda zań jobasy qaralyp jatyr, dep habarlaıdy Egemen.kz.
Depýtattyń aıtýynsha, usynylyp otyrǵan túzetýlerdiń negizgi máni – memlekettik qoldaýdy neǵurlym nysanaly, túsinikti jáne nátıjeli etý.
«Eń aldymen, bul týrıstik ınfraqurylymǵa jumsalǵan shyǵyndardyń bir bóligin óteýge qatysty. Mundaı nysandarǵa naqty talaptardy belgileý ótemaqynyń maqsatty ári negizdi bolýyn qamtamasyz etip, sapa men qoljetimdiliktiń zamanaýı standarttaryna saı keletin vızıt-ortalyqtar men týrısterdi ornalastyrý oryndaryn qurýǵa jáne jańǵyrtýǵa yntalandyrady. Bul, ásirese, basym týrıstik aýmaqtar úshin mańyzdy. Sonymen qatar mundaı tásil qajetti nátıje bermeıtin jáne týrızm salasyndaǵy memlekettik saıasattyń maqsattaryna qol jetkizýdi qamtamasyz etpeıtin nysandardy qoldaý táýekelderin barynsha azaıtady», dedi N. Shatalov.
Onyń sózinshe, odan ári zań jobasy ýákiletti organnyń ózge de qoldaý sharalaryna qoıylatyn talaptardy belgileý jónindegi ókilettikterin bekitedi.
«Atap aıtqanda, birinshiden – el ishinde kámeletke tolmaǵan jolaýshylardy tasymaldaý kezinde týrónim quramyna engizilgen áýe bıletteriniń qunyn sýbsıdııalaý kózdeletin týrıstik ónimge qoıylatyn talaptar; ekinshiden – árbir sheteldik týrıst úshin kelý týrızmimen aınalysatyn týroperatorlardyń shyǵyndaryn sýbsıdııalaý. Iаǵnı qoldaý naqty nátıje men ekonomıkalyq tıimdilikke baǵdarlanady», dedi Májilis depýtaty.
Nıkıta Shatalovtyń pikirinshe, jergilikti atqarýshy organdardyń róli de kúsheıtiledi. Olar basym týrıstik aýmaqtardyń shekaralaryn aıqyndap, memlekettik qoldaý esebinen salynǵan nemese jańǵyrtylǵan nysandardyń saqtalýyn jáne maqsatty túrde paıdalanylýyn baqylaýǵa múmkindik alady.
«Zań jobasynyń ekinshi bóligi balalar jáne buqaralyq sportqa arnalǵan. Depýtattardyń túzetýlerin eskere otyryp, balalar-jasóspirimder sport mektepteri úshin jan basyna shaqqandaǵy normatıvtik qarjylandyrý jáne E-Sport sıfrlyq platformasy engiziledi. Bul bir sportshyǵa jumsalatyn shyǵyndy jylyna 415 myń teńgege deıin arttyrýǵa (qazirgi ortasha deńgeıi shamamen 233 myń teńge) jáne biliktilik úshin qosymsha tólemder arqyly jattyqtyrýshylardyń eńbekaqysyn kóbeıtýge múmkindik beredi. E-Sport platformasy saladaǵy esepke alý, basqarý jáne taldaý jumystaryn qamtamasyz etip, basqa aqparattyq júıelermen derekter almasýdy jolǵa qoıady», dedi ol.
Depýtat atap ótkendeı, zań jobasy muqııat pysyqtalǵan: barlyǵy 110 túzetý usynylyp, jalpy 19 otyrysta qaraldy. Al qorytyndy salystyrmaly keste 75 tarmaqtan turady.
«Usynylyp otyrǵan ózgerister týrızmdi qoldaýdy sapaly ári baqylaýǵa bolatyn deńgeıge kóteredi. Al balalar sportyn qarjylandyrý men basqarý turǵysynan anaǵurlym turaqty etedi. Zań jobasyn ekinshi oqylymda qoldap, ony Senattyń qaraýyna jiberýdi suraımyn», dep túıindedi baıandamasyn N.Shatalov.