Dástúrli memlekettik bilim berý granttarymen qatar, joǵary bilim alýdyń jańa tetikteri de engizilip jatyr. Memleket basshysynyń tapsyrmasymen ázirlengen erikti jınaqtaýshy bilim berý júıesi osy baǵyttaǵy mańyzdy qadamdardyń biri. Bul júıe 2024 jyldan bastap iske qosylyp, ata-analarǵa balanyń erte jasynan bastap bolashaqtaǵy bilim alýyna qarjy jınaýǵa múmkindik berip otyr. Jańa tetik joǵary bilimge qarjylyq qoljetimdilikti arttyrýǵa jáne bilim berý salasyn uzaq merzimdi turǵyda turaqty damytýǵa baǵyttalǵan.
Búginde ekinshi deńgeıli bankterde balalarǵa arnalǵan jınaqtaýshy shottar ashýǵa múmkindik bar. Ata-analar osy boıynsha tıisti bankterden nemese Qarjy ortalyǵynan keńes ala alady. Jınaqtaý úderisi bala 18 jasqa tolǵanǵa deıin júrgiziledi, eń bastysy – ata-ana men bank arasynda jasalatyn tıptik shart talaptaryn saqtaý. Osy merzim ishinde qajetti qarajat jınalyp, ol keıin balanyń bilim alýyna baǵyttalady. Baǵdarlamanyń basty artyqshylyǵy – eger ata-analar shart talaptaryn buzbaı qarajat jınasa, bul qarjyǵa «Ulttyq qor – balalarǵa» jobasy aıasynda jınalǵan qarajatty qosýǵa múmkindik bar. Osylaısha, eki kózden jınalǵan qarajatty biriktirip, bilim alýǵa tolyq paıdalanýǵa bolady.
Memleket tarapynan túrli balama múmkindik te qarastyrylǵan. Eger bala memlekettik bilim berý grantyna tolyqtaı ıe bolsa, jınaqtalǵan qarajatty baýyryna nemese otbasynyń ózge múshesine bilim alý úshin aýdarýǵa bolady, ne bolmasa jınaqty ári qaraı saqtap qalýǵa múmkindik bar. Al joǵary bilim týraly dıplom alǵannan keıin bul qarajatty turǵyn úı jaǵdaıyn jaqsartýǵa paıdalaný tetigi de kózdelgen. Qazirgi tańda elimiz boıynsha balalarǵa arnalǵan osyndaı jınaqtaýshy shottardyń sany 64 myńǵa jetken.
Joǵary bilim alýdyń taǵy bir mańyzdy qarjylyq quraly – jeńildetilgen bilim berý nesıesi. Bul tetik qanatqaqty redimde engizilip, ata-analar tarapynan aıtarlyqtaı qyzyǵýshylyq týdyrǵan. Jyldyq mólsherlemesi 2–3 paıyzdy quraıtyn mundaı nesıe arqyly stýdentter joǵary bilim alýǵa múmkindik alady. Sonymen qatar, dıfferensıaldy grant júıesi de iske asyrylyp jatyr. Bul jaǵdaıda granttyń bir bóligin memleket óteıdi, al qalǵan bóligin ata-analar nemese demeýshiler qarjylandyra alady. Atalǵan joba synaq retinde engizilgen kezde ata-analardan 31 myńnan astam ótinim túsken. Bul ata-analardyń balasynyń bolashaǵy úshin bilimge qarjy salýǵa daıyn ekenin kórsetedi.