Jańa jyl merekesi qarsańynda Ulttyq ulannyń elordalyq 5573 áskerı bóliminiń aýmaǵy jarqyraǵan, ertegideı ári erekshe jyly atmosferaǵa toly naǵyz muz qalashyqqa aınaldy, dep jazady Egemen.kz.
Erekshe jobanyń bastamashylary merzimdi áskerı qyzmetin ótep júrgen sarbazdardyń ózderi. Áskerı qyzmetshiler bólim qolbasshylyǵyna jeke quramǵa merekelik kóńil kúı syılaıtyn jańa jyldyq qalashyqty óz kúshterimen jasaý jóninde usynys bildirgen. Igi bastama qoldaý taýyp, ári qaraı jumys sarbazdardyń yntasy, eńbegi men birliginiń arqasynda alǵa basty.
Ulandyqtardyń muz ben qardan jasalǵan músinderi ár jyldardyń belgisin beıneleıdi. Kompozısııada jylan men jylqy beıneleri – ótken jyl men keler jyldyń sımvoldary retinde erekshe kózge túsedi. Árbir músin uqyptylyqpen, ár bóligine mán bere otyryp jasalyp, avtorlardyń shyǵarmashylyq kózqarasyn aıqyn kórsetti.
Sondaı-aq sarbazdar merekeniń basty belgisi – jańa jyldyq shyrshany da óz qoldarymen bezendirdi. Jaryq shamdary, gırlıandalar men túrli jarqyraǵan elementter qalashyqqa jylylyq pen sıqyrly áser berip, bólim aýmaǵyn merekeni kútý atmosferasyna bóledi.
Jańa jyl merekesi qarsańynda Astana men Almatyda qandaı is-sharalar ótedi?
Aıta ketken jón, bul muz qalashyq ásemdik úshin ǵana jasalmaǵan. Ol bastama men komandırlerdiń qoldaýy, áskerı ujymnyń aýyzbirshiligi bolsa, qystyń ár kúnderi de merekege aınalatynyn kórsetti. Qatań áskerı tártip aıasynda da shyǵarmashylyqqa, jaqsy kóńil-kúıge jáne jańa jyldyq qýanyshqa árqashan oryn tabylatynyn dáleldedi.