Senat depýtaty Gennadıı Shıpovskıh Memleket basshysynyń «Turkistan» gazetine bergen suhbatyna qatysty óz pikirin bildirdi, dep habarlaıdy Egemen.kz.
Gennadıı Shıpovskıh Prezıdent suhbatynda kólik jáne logıstıka salasy keńinen qamtylǵanyn atap ótti. Onyń aıtýynsha, Qazaqstan teńizge tikeleı shyǵatyn joly bolmasa da, Eýrazııanyń dál ortasynda ornalasqan.
«Bul – biz úshin úlken múmkindik. Osy artyqshylyqty tıimdi paıdalanyp, elimizdi Eýrazııa keńistigindegi iri kólik habyna aınaldyrý – strategııalyq maqsat. Suhbatta sońǵy jyldary atqarylyp jatqan naqty jumystar aıtyldy. Jaqynda iske qosylǵan «Dostyq – Moıynty» temirjol magıstrali Qytaı men Eýropa arasyndaǵy júk tasymalyn birneshe ese arttyrýǵa múmkindik beredi. Al aldaǵy ýaqytta jańa temirjol jelileri iske qosylyp, 2030 jylǵa deıin myńdaǵan shaqyrym temirjol salynyp, jóndeledi», dep jazdy G.Shıpovskıh áleýmettik jelide.
Sonymen qatar, depýtat «Ortalyq – Batys» kúre jolynyń qurylysy týraly sóz etken. Onyń aıtýynsha, atalǵan kúre jol el ishindegi qatynasty jeńildetip, óńirler arasyndaǵy baılanysty nyǵaıtady. Bul tek logıstıkaǵa ǵana emes, jalpy kólik salasynyń damýyna serpin beretin mańyzdy joba.
«Prezıdent kólik pen logıstıkanyń búgingi tańda geosaıasattyń da ajyramas bóligine aınalǵanyn atap ótti. Qazaqstan halyqaralyq kólik dálizderin damytýǵa belsendi qatysyp, «Bir beldeý – bir jol», «Soltústik – Ońtústik» jáne Transkaspıı, ıaǵnı Orta dáliz baǵyttaryn ilgeriletip keledi. Jalpy, bul sala – tek jol men temirjol ǵana emes, búkil ekonomıkany biriktiretin mańyzdy júıe. Sondyqtan porttardy, áýejaılardy, vokzaldardy jańǵyrtý, servısti jaqsartý jáne sıfrlyq sheshimderdi engizý – memlekettiń basty mindetteriniń biri», delingen jazbada.