2025 jyldyń qorytyndysy boıynsha Qazaqstanda teatrǵa barý quny aıtarlyqtaı qymbattap, sońǵy 15 jyldaǵy eń joǵary kórsetkishke jetti. Jeltoqsan aıynyń nátıjesimen teatr bıletteriniń baǵasy jyldyq esepte 43,3%-ǵa ósti, dep habarlaıdy Egemen.kz.
Statıstıkaǵa sáıkes, jyl ishinde teatr bıletteriniń baǵasy 7,5 ese jyldam qymbattaǵan. Bul – keminde 2011 jyldan beri tirkelgen eń joǵary ósim. Atalǵan kezeńde teatr bıletteri jyl qorytyndysy boıynsha birde-bir ret arzandamaǵanymen, jalpy tutynýshylyq ınflıasııadan ozyq qarqynmen eki ret ósken.
Buǵan deıin mundaı jaǵdaı 2022 jyly baıqalǵan. Ol kezde geosaıası jaǵdaıdyń kúrt ýshyǵýyna baılanysty teatr bıletteri 22,1%-ǵa qymbattap, jalpy ınflıasııa deńgeıi 20,3% bolǵan. Al 2025 jyly teatr bıletteriniń baǵasy ınflıasııadan 3,5 ese joǵary qarqynmen ósti.
Depýtattar Áýezov atyndaǵy Qazaq ulttyq drama teatrynyń jaı-kúıimen tanysty
Sarapshylardyń málimetinshe, baǵanyń eń belsendi ósýi 2025 jyldyń sońǵy úsh aıynda tirkelgen. Ár aıdyń qorytyndysy boıynsha ortasha ósim 8,4% aılyq kórsetkishti quraǵan. Al jyl ishindegi alǵashqy eleýli ósim maýsym aıynda tirkelip, baǵa bir aıda 10,1%-ǵa artqan.
Aımaqtyq bóliniste teatr bıletteri 20 óńirdiń 15-inde qymbattaǵan, bes óńirde baǵa ózgermegen. Almaty oblysy boıynsha derekter qupııa retinde jarııalanbaıdy. Ortasha respýblıkalyq deńgeıden joǵary ósim Astana men Almaty qalalarynda, sondaı-aq Túrkistan, Shyǵys Qazaqstan jáne Batys Qazaqstan oblystarynda tirkelgen.
Bılik ókilderi baǵanyń ósýin, onyń ishinde, teatrlardyń eksplýatasııalyq shyǵyndarynyń artýymen, ıaǵnı qyzmet kórsetýge qajet taýarlar men qyzmetterdiń qymbattaýymen baılanystyryp otyr. Sonymen qatar memlekettik teatrlar qyzmeti ekonomıkalyq turǵydan shyǵyndy bolyp qala beredi.
Áýezov teatryndaǵy qaıta jańǵyrtý jumystary toqtap qaldy ma?
Osyǵan baılanysty respýblıkalyq jáne jergilikti bıýdjetterden jyl saıyn sýbsıdııa bólinedi. Qarjy mınıstrligi derekterine sáıkes, 2025 jyldyń qańtar-qarasha aılarynda teatrlar men konsert zaldaryn qoldaýǵa bólingen sýbsıdııa kólemi 81,6 mlrd teńgeni quraǵan. Bul kórsetkish nomınaldy túrde ótken jylmen salystyrǵanda 20,9%-ǵa joǵary.
2025 jyldyń basyndaǵy málimet boıynsha, Qazaqstanda 74 teatr jumys istegen. Onyń 32-si Astana men Almaty qalalarynda ornalasqan. Árbir besinshi teatr jekemenshik nysanda qyzmet kórsetedi. 2024 jyly el boıynsha 16,7 myń mádenı is-shara ótkizilgen, olardy 3,1 mln kórermen tamashalaǵan. Bul kórsetkishter 2023 jylmen salystyrǵanda aıtarlyqtaı ózgermegen.
Aıta keteıik, «Astana Balet» teatry jyldy jetistikpen aıaqtady.