2025 jyly azyq-túlik taýarlarynyń kóterme baǵasy 2024 jylmen salystyrǵanda 3,4%-ǵa ósken. Bul rette otandyq óndiristegi ónimder 2,7%-ǵa, TMD elderinen jetkizilgen taýarlar 6%-ǵa, al basqa elderdiń ónimderi 2,1%-ǵa qymbattaǵanyn Ulttyq statıstıka bıýrosy málimdedi. Azyq-túlik ónimderi baǵasynyń ósýi jalǵasyp jatyr, dep habarlaıdy Egemen.kz.
Azyq-túliktiń ortasha baǵasynyń eń kóbirek ósýi – Jetisý oblysy (+8,4%) men Batys Qazaqstan oblysynda (+8,9%) jáne Shymkent qalasynda (+9,3%) baıqalǵan.
Kóterme baǵalardyń azdap tómendeýi tek Atyraý oblysynda ǵana (-1,2%) baıqalyp otyr.
Eger jaǵdaıdy tolyǵyraq qarastyrsaq, baǵanyń eń kúrt ósýi jańa pisken kókónisterge (kartoptan basqa) qatysty boldy – 38,5%. Sondaı-aq qanttan jasalǵan kondıterlik ónimder (+22,5%), et (+22,3%), kofe men onyń almastyrǵyshtary (+21,8%), jańǵaqtar (+19%) aıtarlyqtaı qymbattaǵan.
Kóterme saýdagerler sary maıdyń baǵasyn (+16,6%), shokoladty (+16%), et ónimderin (+15,4%), tuzdy (+15%), ósimdik maılaryn (+14,7%), balyq, shaıantárizdiler men mollıýskilerdi (+14,6%) qymbattatty.
Odan keıin jańa pisken jemister – 12,4%-ǵa, dámdeýishter men tatymdyqtar – 10,2%-ǵa, sút ónimderi – 7,5%-ǵa, sýsyndar – 5%-ǵa qymbattady.
Al kartoptyń kóterme baǵasy 12,2%-ǵa tómendedi. Sondaı-aq kúrish (-7,1%) pen jumyrtqa (-0,4%) arzandady.