Venesýela oppozısııasynyń jetekshisi ári Nobel syılyǵynyń laýreaty Marııa Korına Machadonyń ózine berilgen Beıbitshilik syılyǵyn AQSh prezıdenti Donald Trampqa tabystaý týraly málimdemesine Norvegııa Nobel komıteti resmı jaýap qatty. Komıtet mundaı áreket uıymnyń erejesine saı kelmeıtinin málimdedi, dep jazady Egemen.kz.
Norvegııa Nobel komıtetiniń habarlaýynsha, syılyqty basqa adamǵa berý nemese keri qaıtaryp alý tetigi qarastyrylmaǵan.
«Nobel beıbitshilik syılyǵynyń laýreatyn marapattan aıyrý múmkin emes. Alfred Nobeldiń ósıetinde de, Nobel qorynyń jarǵysynda da mundaı múmkindik kórsetilmegen. Nobel qory jarǵysynyń 10-paragrafyna sáıkes, «syılyq berý týraly sheshim shaǵymdanýǵa jatpaıdy». Stokgolm men Oslodaǵy birde-bir Nobel komıteti buryn-sońdy berilgen syılyqty qaıtaryp almaǵan», dedi komıtet músheleri.
Komıtet sonymen birge laýreattarǵa syılyq tabystalǵannan keıin olardyń saıası málimdemeleri men is-áreketterine baǵa bermeıtinin atap ótti. Nobel komıtetiniń ókilettigi tek belgili bir jyldaǵy syılyqty taǵaıyndaýǵa deıingi kezeńmen shekteledi.
Buǵan deıin Marııa Korına Machado 2025 jyly ózine berilgen Nobel beıbitshilik syılyǵyn Donald Trampqa tapsyrýdy qalaıtynyn aıtqan. Ol muny Tramptyń «demokratııalyq quqyqtar úshin tynymsyz kúresi» jáne Venesýelanyń demokratııaǵa ótýine qosqan úlesimen túsindirdi.
6 qańtarda Machado «Men bul syılyqty oǵan jeke tabystap, venesýelalyq halyq ony onymen bóliskisi keletinin aıtqym keledi» degen. Onyń aıtýynsha, ol laýreattar 2025 jylǵy 10 qazanda jarııalanǵan sátten bastap bul marapatty Trampqa syılaımyn dep nıettengen. Sonymen birge ol sol kúnnen beri AQSh prezıdentimen sóılespegenin de málimdedi.
Aıta keteıik, AQSh-tyń Venesýela prezıdenti Nıkolas Madýroǵa qarsy áskerı operasııasynan keıin, ony elden shyǵardy.
Machado bastaǵan oppozısııa Madýro tutqyndalǵan jaǵdaıda bılikti óz qolyna alýǵa daıyn ekenin jarııalady. Al 3 qańtarda Donald Tramp Machadonyń eldi basqarý múmkindigine kúmán keltirip, onyń «elde jetkilikti qoldaýy men bedeli joq» ekenin aıtqan.