Búgin Úkimet otyrysynda ónerkásip jáne qurylys vıse-mınıstri Qýandyq Qajkenov Memleket basshysynyń halyqty 2025 jyldyń sońyna deıin aýyz sýmen qamtamasyz etý jónindegi tapsyrmasynyń tolyq oryndalǵany týraly baıandady, dep jazady Egemen.kz.
Onyń aıtýynsha tapsyrmany oryndaý kezeńinde respýblıkalyq bıýdjetten shamamen 835 mlrd teńge bólingen. Onyń ishinde qaıtarylǵan aktıvter esebinen Arnaýly memlekettik qordan 132 mlrd teńge jumsalǵan.
«Osy qarajatqa 34 qala men 756 aýyl ortalyqtandyrylǵan sý júıesimen qamtyldy. Oǵan qosymsha, jergilikti bıýdjet esebinen 699 aýylda keshendi blok-modýlder ornatyldy. Salystyrmaly túrde aıtsaq, 2021 jyly aýyl halqynyń 90%-y jáne qala halqynyń 97,5%-y sýmen jabdyqtaý qyzmetterine qol jetkizgen edi. Osylaısha, Memleket basshysynyń tapsyrmasy tolyq oryndalyp, elimizdegi 90 qala men 7,5 mln turǵyny bar 6087 aýyl aýyz sýmen tolyq qamtamasyz etilip otyr», dedi vıse-mınıstr.Sýmen jabdyqtaý sapasynda barlyǵy 9,5 myń shaqyrym magıstraldyq jeli rekonstrýksııalanyp, úlkeıtilgen. Onyń ishinde qalalarda – 1,8 shaqyrym, aýyldarda – 7,7 myń shaqyrym sýmen jabdyqtaý júıesi jańǵyrtylǵan. Bul jumystar jelilerdiń tozý deńgeıin – 38%-ǵa deıin tómendetýge múmkindik berdi. Sonymen qatar sýmen jabdyqtaýdy jáne kommýnaldyq ınfraqurylymdy damytý jumystary jalǵasyp jatyr. Osy baǵytta 2026 jylǵa jalpy transfertter aıasynda 128 mlrd teńge bólindi, onyń ishinde sýmen jabdyqtaýǵa – 78 mlrd teńge, sý burýǵa 50 mlrd teńge baǵyttalǵan.
Qosymsha jańǵyrtý jumystary Energetıka men kommýnaldyq sektordy jańǵyrtýǵa arnalǵan ulttyq joba aıasynda nesıelik qarajattar esebinen júrgiziletin bolady.
Byltyr el óńirlerindegi birneshe eldi mekenge taza aýyz sý berilgenin habarlaǵanbyz. Máselen, ótken jyly shalǵaıdaǵy Aqbastyǵa sý jetip, Syr óńiri aýyz sý máselesin tolyq sheshti.
Sondaı-aq, Ulytaý oblysyndaǵy Keńgir aýyly gazǵa qosylyp, taza aýyz sýmen qamtyldy.
Mańǵystaýda da aýyz sý tapshylyǵy joq ekeni habarlandy.