TARAZ. 12 mamyr. Uly Otan soǵysynyń dańqty jaýyngerleriniń biri, ataqty mergen Ybyraıym Súleımenovke eskertkish ornatyldy. Bul týraly egemen.kz tilshisi habarlady.
Uly Otan soǵysynyń tarıhyna kóz júgirter bolsaq, 1941 jyly Qyzyl Armııa qataryna shaqyrylyp, mergendikti ıgergen Y.Súleımenov Kalının maıdanynda bolǵan alǵashqy shaıqastardyń ózinde vıntovkasymen 79 fashısti jer jastandyrǵan. Velıkıe Lýkı qalasy úshin bolǵan shaıqasta 60 jaýdyń kózin joıdy. Al 1943 jyldyń kúzinde Nevel qalasy úshin bolǵan keskilesken shaıqasta ol 102 fashısti óltirip, asqan erlik kórsetip qaza tapqan. Sol qandy shaıqasta surmergen batyr qazaqtyń aıaýly qyzy, pýlemetshi Mánshúk Mámetova ekeýi bir kúnde, bir maıdan shebinde Otan úshin janyn pıda etti. Ekeýiniń de súıegi Nevel qalasynda jerlendi.
Aıta ketken jón, byltyr osy Nevel qalasyndaǵy Ybyraıym Súleımenov atyndaǵy kóshede batyrǵa arnalǵan memorıaldy taqta ashylǵan bolatyn. Endi, mine, qalamyzdaǵy batyr atyndaǵy kóshede surmergen jaýyngerge arnalǵan eńseli eskertkish boı kóterdi. Bıiktigi 2 metr, tuǵyry 2 metr eskertkish postamenti temir betonnan quıylyp, granıtpen qaptalǵan. Músin avtory – Qazaqstan Sýretshiler odaǵynyń múshesi Momysh Seıitkerim.
«Halqymyzdyń maqtan tutar arda uly, quralaıdy kózge atqan surmergen Ybyraıym Súleımenov óziniń jas ómirin qasıetti Jeńis jolynda qurban etti. Esimi Uly Otan soǵysy tarıhynda altyn árippen jazylyp qaldy. Halqymyz «El úmitin er aqtar, er ataǵyn el saqtar» dep aıtqanyndaı, eliniń úmitin aqtap, halqynyń beıbit bolashaǵy úshin janyn qıǵan batyrdy el de umytpaq emes», – dedi eskertkishtiń ashylý rásiminde Jambyl oblysynyń ákimi Kárim Kókirekbaev. Sondaı-aq bul jıynda batyrdy basylym betteri arqyly nasıhattap, eskertkishtiń ashylýyna septigin tıgizgen belgili jýrnalıst, oblystyń Qurmetti azamaty Saǵat Arynuly mergenniń ómiri men órlikke toly erliginen syr shertti.
Oralhan Dáýit.
Derek, sýret: egemen.kz.