Úkimette vıse-premer – Ulttyq ekonomıka mınıstri Serik Jumanǵarınniń tóraǵalyǵymen 2026–2028 jyldarǵa arnalǵan kóleńkeli ekonomıkaǵa qarsy keshendi is-qımyl josparynyń jobasy qaraldy.
Qujat kóleńkege yǵysý qaýpi joǵary densaýlyq saqtaý men áleýmettik qyzmetter, saýda, bilim berý, qurylys pen aýyl sharýashylyǵy sııaqty bes negizgi salany qamtıdy. Bul rette jospardy ázirleý kezinde bıznes úshin jańa mindetter engizý nemese retteýdi qatańdatý sharalary alynyp tastaldy.
Boljamdy kórsetkishterge sáıkes, «IJО́-degi baqylanbaıtyn ekonomıkanyń úlesi» nysanaly ındıkatoryn bıyl 14,5%-ǵa, kelesi jyly 14%-ǵa, 2028 jyly 13,8%-ǵa tómendetý josparlanyp jatyr. Keshendi jospar tórt negizgi bloktan jáne 30 is-sharadan turady. Olar – taýar óndirisi, qyzmetter óndirisi, fıskaldyq ákimshilendirýdi jetildirý men zańsyz áreketke qarsy turý.
Saýda salasyndaǵy «sur» ımport kólemin azaıtýǵa erekshe nazar aýdarylyp otyr. О́ıtkeni odan naryqqa adal jolmen qatysatyndar zardap shegip júr. Saýda jáne ıntegrasııa mınıstrligine bıznes-qoǵamdastyqpen birlesip, teris jolmen ákelinetin taýarlar nomenklatýrasyn aıqyndaý, Memlekettik kirister komıtetimen birlesip, órkenıetti naryqty qorǵaý sharalaryn ázirleý tapsyryldy.
Jospardy júzege asyrýda sıfrlyq sheshimder men jasandy ıntellekt quraldary mańyzdy rólge ıe bolady. Is-sharalardyń oryndalýyn baqylaý men monıtorıng jasaý Smart Data Finance AJ-nyń sıfrlyq platformasy arqyly júzege asyrylýy múmkin. Barlyq is-sharalardy júzege asyrý tıisti salalardaǵy salyq túsiminiń ósýin qosqanda, sıfrlandyrýǵa, JI modelderge, ólshenetin KPI-ǵa basa nazar aýdara otyryp, birlesken jol kartalary men jumys toptary sheńberinde júrgiziledi.
Keshendi jospardyń jobasy maquldandy. Belgilengen rásimder jasalǵannan keıin Úkimet ony odan ary júzege asyrý úshin qabyldaıdy.