Elimizdiń mánerlep syrǵanaýshylary HHI ǵasyrdyń ekinshi onjyldyǵynda jarqyrap shyǵyp, halyqaralyq arenada ózderiniń myqtylyǵyn moıyndata bastady. Alǵashynda Denıs Ten oljaǵa kenelse, odan keıin Elızabet Tursynbaeva top jardy.
Esimderi atalǵan myqtylardyń ekeýi de qazir úlken sportta joq. Sochı Olımpıadasynda qola alyp, álem chempıonatynda eki ret jeńis tuǵyryna kóterilgen Denıs 2018 jyldyń jazynda, jarqyldap turǵan 25 jasynda Almatynyń qaq ortasynda qaraqshylar qolynan qaza tapty. Elızabet 2019 jyly Saıtamada uıymdastyrylǵan dúnıejúzilik dodada kúmis medaldy moınynda jarqyratty. Sol jyly Dúnıejúzilik ýnıversıada men «Tórt qurlyq birinshiliginde» de ekinshi oryndy ıelendi. Biraq arada eki jyl ótken soń, eski jaraqattarynan aıyǵa almaǵan 21 jastaǵy asa daryndy Elızabet qalyń jurttyń aldynda óziniń sporttyq mansabyn aıaqtaıtynyn jarııa etti.
Sodan keıin Mıhaıl Shaıdorovtyń dáýiri bastaldy. 2004 jyldyń jazynda Almatyda dúnıege kelgen jas óren birden dara talantymen tanyldy. Alǵashynda ákesi Stanıslav Shaıdorovtyń, odan keıin reseılik Alekseı Ýrmanovtyń qol astynda jattyqqan jastyń sheberligi ýaqyt ozǵan saıyn shyńdala tústi. 2022 jyly Mısha Tallınde ótken jastar arasyndaǵy álem birinshiliginde kúmis medal ıelenip, kópshilik nazaryn ózine aýdardy. Baltyq jaǵalaýynda jerlesimiz amerıkalyq Ilıa Malınınnen ǵana qalyp qoıdy. Bul tarıhı sát edi. Olaı deýge negiz, oǵan deıin elimizdiń birde-bir mánerlep syrǵanaýshysy jastardyń álemdik dodasynda júlde alǵan emes. Tipti maqtaýly Ten men Tursynbaevalardyń ózi kezinde tórtinshi oryndy qanaǵat tutty.
Kóp uzamaı keıipkerimiz eresekter arasyndaǵy básekelerde óner kórsete bastady. Bul saıystarda da Shaıdorovtyń juldyzy jarqyraı jandy. Qatarynan bes ret el chempıony atanǵan saıypqyran halyqaralyq jarystardan da oljaly oraldy. Almatylyq órenge ásirese ótken jyl asa tabysty boldy. Seýldegi «Tórt qurlyq birinshiliginde» aldyna jan salmasa, Harbındegi Azııa chempıonatynda qolaǵa qol sozdy. Bostonda jalaýy jelbirgen álem chempıonatynda kúlli qazaq jankúıerleri Mıhaılge dán rıza boldy. Nebir kúrdeli elementterdi sátti oryndap, sheberliktiń shynaıy úlgisin kórsetken otandasymyz kúmis medal enshiledi. Bul joly da onyń aldyn Ilıa Malının orap ketti.
21 jastaǵy Mıhaıl Shaıdorov qazir naǵyz babynda. Keıingi kezderi ótken jarystarda onyń únemi jeńis tuǵyrynan kórinýi – osy sózimizdiń aıqyn dáleli. Endigi maqsaty – Apennın túbeginde alaýy tutanatyn Olımpııa oıyndarynda atoı salý. Ol maqsatyna qol jetkizýge elimizdiń ataqty mánerlep syrǵanaýshysynyń barlyq múmkindigi bar. Basqalaı aıtqanda, bul jigittiń jóni bólek, Olımpıada altynynan úmittimiz.