Ulttyq bank tóraǵasy Tımýr Súleımenov el azamattaryn baspana nesıesin rásimdeýde asyǵystyq tanytpaýǵa shaqyrdy. Onyń paıymynsha, qazirgideı ınflıasııa joǵary jáne bazalyq mólsherleme shyńynda turǵan kezeńde qaryz alý – azamattardyń qaltasyna aýyr salmaq salady, dep habarlaıdy Egemen.kz.
Ulttyq bank basshysy nesıe naryǵyndaǵy qazirgi jaǵdaıdyń ýaqytsha ekenin alǵa tartty. Onyń aıtýynsha, ınflıasııa deńgeıiniń tómendeýi bazalyq mólsherlemeniń azaıýyna, al bul óz kezeginde ekinshi deńgeıli bankterdiń paıyzdaryn tómendetýge ákeledi.
«Naryqtaǵy paıyzdyq mólsherlemeler joǵary kezeńde nesıe men ıpoteka rásimdeýden tartyna turyp, ony keıinge qaldyrǵan durys. Inflıasııa báseńdegen saıyn bazalyq mólsherleme de azaıady, sonymen birge banktik paıyzdar da azaıady. Azdap kúte turý kerek», dep atap ótti Ulttyq bank tóraǵasy.
Onyń paıymynsha, sabyr saqtaǵan qaryz alýshylar bolashaqta anaǵurlym tıimdi sharttardy paıdalana alady. Aqsha-nesıe saıasaty turaqtalǵan kezde, qaryz júktemesi halyq úshin áldeqaıda jaıly bolmaq.
Qazaqstanda ıpoteka boıynsha paıyzdyq mólsherlemeler nege tómendetilmedi?
Eske salaıyq, 2025 jylǵy maýsym aıynyń ortasynda ıpotekalyq nesıeler boıynsha jyldyq tıimdi syıaqy mólsherlemesin (JTSM) 25%-dan 20%-ǵa deıin tómendetý josparlanǵan bolatyn. Osyǵan baılanysty Qarjy naryǵyn retteý jáne damytý agenttigi men Ulttyq bank tıisti qaýly qabyldaǵan edi. Basty maqsat – ıpotekalyq turǵyn úı nesıeleriniń qoljetimdiligin arttyrý.
Alaıda 2025 jylǵy 17 maýsymda Qarjy naryǵyn retteý jáne damytý agenttigi men Ulttyq bank ıpoteka boıynsha eń joǵary mólsherlemeni 20%-ben shekteý normasynyń qoldanylýyn toqtata turý týraly birlesken qaýly shyǵardy. Qujatqa sáıkes, tómendetilgen mólsherleme 2025 jylǵy 1 qarashadan bastap kúshine enýi tıis bolǵan.
Oqı otyryńyz: Endi turǵyn úıde úlesi bar azamattar jeńildetilgen ıpoteka ala alady