Zamanaýı tehnologııa teatrǵa da jetti

Osy turǵyda elordanyń injý-marjany sanalatyn «Astana Opera» teatry – zamanaýı tehnologııalar men klassıkalyq ónerdiń úılesim tapqan jarqyn úlgisi. Teatr dırektorynyń orynbasary Vıktor Karare sahna syrtyndaǵy kózge kórinbeıtin, alaıda orasan aýqymdy tehnologııalyq ózgerister jóninde áńgimelep berdi. Búginde «Astana Operada» jaryq partıtýrasynan bastap beıne-kontent, dybys rejıssýrasy, rekvızıt pen kostıýmerlik sehtardyń jumysyna deıin túgeldeı sıfrlyq júıege kó­shiril­gen.

«Munyń barlyǵy sahnanyń or­talyq kompıýterinde saq­talyp, sol arqyly basqary­lady.Sonyń arqasynda kórinisteri men aktileri jıi aýysatyn kúr­deli spektaklderdi minsiz deń­geıde ótkizýge múmkindik bar. Bul – bir­tutas, naqty uıym­das­ty­ryl­ǵan úlken mehanızm», deıdi Vıktor Karare.

Sıfrlandyrý tek sahnamen shektelmeıdi. Ol ınjenerlik jelilerdi de qamtyp, kórermen zalynyń jaıly temperatýrasyn avtomatty túrde rettep otyrady. Dekorasııany montajdaý, daıyndyq barysy, qoıy­lym kúntizbesi men logıstıka – barlyǵy keshendi aqparattyq júıe arqyly úılestiriledi.

Arnaıy effektiler de jańa sıpatqa ıe boldy. Buryn sah­na­daǵy órt nemese alaý áseri jel­men jelbiregen qyzǵylt-sary matamen beınelense, bú­gin­de bul mindetti kúrdeli sıfr­lyq júıe­ler atqarady. Tútin men pıro­teh­nı­kalyq effek­tiler sahnadan elý metr qa­shyq­ta ornalasqan pýlt arqy­ly iske qosylady. Bul eń aldymen qaýipsizdik pen dáldikti qam­ta­ma­syz etedi.

Mundaı tehnologııalar alǵash qoldanylǵan spektaklderdiń biri – B.Asafevtiń «Baqshasaraı burqaǵy» baleti. Qazir teatrdyń tehnıkalyq múmkindikteri aıtar­lyq­taı keńeıip, 3D-proek­sııa­lar, frontaldy beıne meppıng, LED-ekrandar, kúrdeli kótergish mehanızmder men pnevmatıkalyq júıeler iske qosylǵan. Munyń barlyǵy sıfrlyq basqarý ar­qyly júzege asady. Al zamanaýı tehnologııalar keńinen qol­dany­latyn qoıylymdardyń biri – «Turandot» operasy. Onda kórermender shynaıy jaýyn astynda qalǵan sahnany, hanshaıym Turandottyń jer astynan paıda bolýyn, ártisterdiń aıdahar basynan shyǵa keletin áserli sátterin tamashalaı alady.

«Sıfrlyq tehnologııalar kórer­men kóretin dúnıeni ǵana emes, shymyldyqtyń ar ja­ǵyn­daǵy aýqymdy jumysty da túbegeıli ózgertti. Olar ár bólim­sheniń jumysyn naqty jos­parlap, úılestirýge múmkindik beredi. Qarqyndy repertýarmen jumys isteıtin teatr úshin bul – asa mańyzdy», dep sózin jalǵady Vıktor Karare.

Onyń aıtýynsha, Sıfrlan­dyrý jáne jasandy ıntel­lekt jyly qaǵaz júzinde qalyp qoı­maı, naqty istermen kóri­nis ta­ýyp keledi. Buryn ssenogra­fııa­lyq jobalar qaǵazǵa túsirilse, búginde olardyń barlyǵy elektrondy formatqa kóshken.

«Astana Operadaǵy» sıfr­lyq tehnologııalar – kún­delikti teh­nıkalyq jumys­ty óz moınyna alyp, shyǵarmashylyqqa keńistik asha­tyn qural. Olar teatrǵa ýa­qyt­pen birge qadam basyp, aýqymdy ári áserli spektakl­der ja­saý­ǵa jol ashady», dep sózin túıin­dedi dırektordyń orynbasary.

Klassıkalyq óner men sıfr­lyq dáýirdiń toǵysqan sátin kór­gisi kelgen kórermen «Astana Opera» sahnasynda 4 aqpanda ótetin «Baqshasaraı burqaǵy» spek­­taklin tamashalap, teatr ǵajaıy­bynyń kýási bola alady.