Jalyndy pýblısıst, erjúrek jaýynger Baýbek Bulqyshev – qazaq aspanynda juldyzdaı jarq etken tulǵalardyń biri. 1939 jyly «Lenınshil jas» (qazirgi «Jas Alash») gazetinde ádebı qyzmetker, «Oktıabr balalary» (búgingi «Ulan») gazetiniń bólim meńgerýshisi qyzmetin atqaryp júrgende 1940 jyly ásker qataryna shaqyrylady.
Máskeýde saper ýchılıshesinde oqıdy. Ekinshi dúnıejúzilik soǵysta oq pen ottyń ortasynda júrip, «Tyńda, Kavkaz», «Men ómir súrgim keledi», «Shyǵys ulyna hat» atty azamattyq rýhqa toly jalyndy dúnıeler jazady. Qazaq jáne orys tilinde jetik jazatyn jas qalamgerdiń maqalalary «Sosıalıstik Qazaqstan», «Komsomolskaıa pravda» gazetterinde jaryq kórgen. Maıdan dalasynda qalamymen de, qarýymen de kúresken Baýbek 1944 jyly qaza tabady.
Qaısar qalamger, jalyndy jaýyngerdiń týǵan jeri Ulytaý aýdanynda Baýbek Bulqyshevtiń 110 jyldyǵyna arnalǵan mádenı is-shara uıymdastyryldy. Aýdan ortalyǵynda ornalasqan Baýbek Bulqyshev pen Muqan Imanjanov eskertkishterine gúl shoqtary qoıyldy.
Aýdandaǵy «Ulytaý» sapar ortalyǵynda Baýbek Bulqyshevqa arnalǵan «Taý uly» taqyrybynda kórme uıymdastyryldy. Dóńgelek ústel basynda Baýbek Bulqyshevtiń urpaǵy, Amangeldi aýylynyń turǵyny Qanat Baısalbekov, Ulytaý tarıhı-mádenı jáne tabıǵı qoryq-mýzeıiniń basshysy Ǵalym Ospanov, aýdandyq tarıhı-ólketaný mýzeıiniń qyzmetkeri Nursulý Raımova qalamgerdiń sońynda qalǵan murasyn arqaý etken baıandama jasady.
Baýbek Bulqyshevtiń ómiri men shyǵarmashylyǵynan beınerolık kórsetildi.
Ulytaý oblysy