Úkimettiń keńeıtilgen otyrysynda Prezıdent Qasym-Jomart Toqaev qorytyndy sóz sóılep, jańa Ata zań jobasynda usynylyp otyrǵan ózgeristerdiń arqaýy adamdardyń jáne azamattardyń quqyqtary men bostandyqtaryn qorǵaý ekenin atap ótti, dep jazady Egemen.kz.
«Biz adam quqyǵynyń qorǵalýyna kepildik beretin jáne onyń naqty joldary aıqyn kórsetiletin birtutas júıe qalyptastyramyz. Mysaly, advokattardyń usynysymen Ata zań jobasyna advokatýra týraly jeke bap qosyldy. Jańa Konstıtýsııa jobasynda bilim berý júıesine basa mán berý arqyly memlekettiń zaıyrly sıpaty da naqtylana tústi.
Al «Neke – erkek pen áıeldiń erikti jáne teńquqyly birlestigi, ıaǵnı odaǵy» degen tujyrym arqyly qoǵamdaǵy dástúrli qundylyqtardy saqtap qalý maqsaty kózdeldi. Konstıtýsııa jobasynda tabıǵatty qorǵaý máselesine de nazar aýdaryldy. Menińshe, bul – óte mańyzdy nárse», dedi Memleket basshysy.
Qasym-Jomart Toqaev túzetýlerdiń ishine taǵy bir asa qajetti normany engizý kerek ekenin aıtty.
«Qazirgi Konstıtýsııada «Turǵyn úıge qol suǵýǵa bolmaıdy. Sot sheshiminsiz turǵyn úıden aıyrýǵa jol berilmeıdi» degen ereje bar. Osy erejeni «turǵyn úıden májbúrlep shyǵarýǵa» da sot sheshiminsiz jol berilmeıdi dep tolyqtyrǵan jón. Menińshe, bul – jańa Konstıtýsııanyń sıpatyna tolyq saı keletin áleýmettik norma. Konstıtýsııalyq komıssııa múshelerinen osy usynysty qaraýdy suraımyn.
Tutastaı alǵanda, Negizgi zań jobasynda Qazaqstannyń qarqyndy damýyna, ultymyzdyń uıysýyna qajetti irgeli qaǵıdattar men qundylyqtar tolyq qamtylǵan», dedi Prezıdent.
Eske salaıyq, Prezıdent tóraǵalyǵymen Úkimettiń keńeıtilgen otyrysy ótip jatyr.
Prezıdent: Konstıtýsııalyq komıssııanyń jumysy barynsha ashyq júrgizildi