«Botaqanym, qaraısyń móldiregen kózińmen,Aqqýlar sezimindeı mahabbatty sezinem.Bir ózińe bar syrymdy aıtaıyn dep kelgende,Qalady til baılanyp uıalǵandaı ózińnen...»
Jas ánshi Jandos Qarjaýbaı shyrqap júrgen bul ánniń áýeni de, sózi de tyńdarmandy elitip áketedi. Toı-tomalaq tóńiregindegi jeńil ándeı kóringenimen, shyǵý tarıhy salmaqty, shynaıy mahabbattyń qudiretinen týǵan dúnıe. Sóziniń de, sazynyń da avtory – Samar aýdanynyń týmasy Asqar Ysqaq. Kezinde «Muztaý» tobynyń quramynda án shyrqap, jurtshylyqqa tanylǵan ónerpazben arqany keńge salyp, áńgimeleskenimiz bar. Kóńildi keshte lek-legimen avtorlyq ánderin oryndady. Biz qol soqtyq, bárekeldi destik. Sonda ǵoı, búginde hıtke aınalǵan «Aqmaralym» ániniń shyǵýyna úńilgimiz kelgeni. Asqar Ysqaq ta tartynbady, jymıyp qoıyp, taǵdyrly tarıhtan tarta sóıledi.
«Qyzmet babymen Kókpekti aýdanyna aýysyp, sol jaqta konsert berdik. «Muztaý» tobynyń dúrkirep turǵan shaǵy. Án men kúıge sýsaǵan el zalǵa lyq toldy. Jasy bar, qarty bar... Kórermen qol soqqan saıyn shabyttanamyz. Ándetip turyp, bir ýaqytta zaldyń ortasyndaǵy sulýǵa kózimniń túskeni. Móldiregen sulý maǵan qadala qarap turǵandaı kórindi. Ánimniń sózin umytyp qalmasam eken deımin. Konsert tezirek aıaqtalyp, álgi qyzben tanysýǵa asyqtym. Bir jarym saǵattyq konsertim ǵasyrǵa sozylǵandaı, ýaqyt ótpedi. Arý da kóz aldymnan ketpedi. Konsert sońynda el-jurttyń qoshemetinen, qushaq-qushaq gúlinen góri álgi qyzdyń qıyla qaraǵany mańyzdy sekildi edi. Kópshiliktiń ishinen izdep júrip taptym áıteýir. Qalaı batylym jetkeni esimde joq, tanystym. Sol aýyldaǵy ápkesiniń úıine kelip júrgen 11-synyp oqýshysy edi. Esimi Aqmaral. Áńgimemiz jarasqan soń sezimimdi bildirdim. О́zi kórshi aýylda turady eken. Ol zamanda kólik joq, kórshi aýyldyń ózine jetý qııamet-qaıym. Áýelde demalys saıyn kelip júrgen, keıin sıretti. Saǵyna bastadym. Ápkesiniń úıi jaǵyna eleńdeı júrip, kómeıge ádemi áýen kele bastady. Keıin júrektegi sezim sóz bolyp tógildi.
«Joǵalasyń kóp nege,
Kelip ketpeı ápkeńe?
Saǵynyshym, qaıdasyń,
Qasyma kel, erkele...» dep ándetip júrdim. Sóıtip júrip, kádimgi óleń bolyp órilip tústi. Áýen de daıyn edi. Shyǵarmashylyǵymyzdyń da sharyqtap turǵan shaǵy. Ár shyǵarǵan ánimiz tyńdarmannyń qulaq quryshyn qandyryp jatty. Kóp uzamaı jańa ánim «Aqmaralymdy» da sahnaǵa alyp shyqtyq. Tez tarap ketti. 2000 jyldardyń hıti desek te bolady. Jyldar ótti. Aqmaral ekeýimiz sóz baılasyp, alyp qashatyn bolyp sheshtim. Sebebi, onyń ákesi maǵan qarsy boldy. Ashyǵyn aıtaıyn, men qarapaıym otbasydan shyqqan balamyn. Iyǵyma asyp júrgen dombyramnan basqa túgim joq. О́nerim – óleńim. Ol bolsa, baqýatty baıdyń qyzy. Ákesi aýdandaǵy bedeldi kásipker. Dese de, bizdiń bir-birimizge degen sezimimiz bárinen bıik tur edi. Naǵyz mahabbat osy shyǵar dep oılaǵam. Solaı da. Shyn ǵashyq bolmasam, mundaı óleń týmas ta edi ǵoı. Sóıtip, ýádeleskenimizdeı aıly túni Aqmaralymdy alyp qashtym. Alyp qashqanda da óz aýylyma emes, Qalba jotalarynyń qaıdaǵy bir qýysyndaǵy Almas dosymnyń aýylyna qaraı attandym. Qýǵynshy shyqsa, adastyryp ketsem degen oı ǵoı. Baǵyt Bóke deıtuǵyn shaǵyn aýyl. Zýlaǵannan zýlap, tún aýa jettik. Aýyl ishi jym-jyrt. Keshki as-sýymyzdy ishken soń kóńil de jaılandy. Baqyttan basymyz aınalyp mázbiz. Ishteı bolashaqtyń josparyn quryp tastadyq. Sóıtkenshe bolǵan joq, úıdiń artqy jaǵynan avtokóliktiń jaryǵy jarq etti. Esigi sart-surt jabyldy da, basa-kóktep qyzdyń ákesi kirdi. Sustana qarady bizge. Qyzyn súıreı jóneldi. Men sońdarynan shyqtym. Aqmaraldy artqy esikten otyrǵyzyp, ózi rýlge jaıǵasqansha, Aqmaral arǵy esikten atyp shyǵyp qashqan. Dúnıe astań-kesteń boldy da ketti. Ashýly áke qoısyn ba, qyzyn aqyry alyp ketti. Bir sátke ómir osymen toqtap qalǵandaı kórindi. Sondaǵy tańǵalǵanym, áke júrektiń jumbaq sezimi. Eshkimniń oıy túgili túsine kirmeıtin aýylǵa alyp qashqanyn qaıdan bildi deımin de.
Ýaqyt ótti. Bul jaǵdaı umyt bola bastady. Aqmaralmen jasyryn kezdestik. Urlana baryp júrdim. Mahabbatymyz odan saıyn órshı tústi. Aqyr aıaǵy úılendik, úıli boldyq, uldy boldyq. Qudaıǵa shúkir, ulym qazir er jetti...» dep taǵdyrynan syr sherte otyryp, «Aqmaralym» ánin dombyramen oryndap berdi Asqar Ysqaq. Oılap otyrsaq, ekeýiniń ǵashyqtyq oqıǵasy keshegi Eńlik pen Kebektiń, Qozy menen Baıannyń mahabbatyna para-par. Qaıdan oqyǵanymdy umyttym, saǵan aqyn nemese jazýshy ǵashyq bolsa deıdi, ólmeıdi ekensiń. Aıtqandaı, Asqardyń júreginde ǵana emes, kúlli tyńdarmannyń júreginde Aqmaral máńgi jasaıdy.