Petropavl qalasynda Kozybayev University bazasynda «Qazaqstannyń zamanaýı Konstıtýsııalyq modeli» atty pikirtalas alańy uıymdastyryldy, dep habarlaıdy Egemen.kz.
Kezdesý barysynda medısına fakýltetiniń stýdentteri jańa Konstıtýsııa jobasyn jáne aldaǵy reformalardy medısınalyq mekemeler ókilderi men ýnıversıtet qyzmetkerlerimen talqylady.
Pikirtalas alańyna medısına fakýltetiniń 20-dan astam stýdenti qatysty. Kezdesýdi asha otyryp, Kozybayev University medısına fakýltetiniń dırektory Serik Bahtııar joba boıynsha jumys ashyq júrgizilgenin atap ótti: talqylaý platformasyna myńdaǵan pikirler men usynystar túsken.
Onyń aıtýynsha, qujattaǵy tujyrymdardyń edáýir bóligi jańartylyp, preambýlada jáne normalarda alǵash ret adamǵa baǵdarlanǵan ustanym, ǵylym men bilimniń memleketti damytýdaǵy róli aıqyn kórsetilgen.
Jobada qarastyrylǵan bir palataly Parlament-Quryltaıǵa kóshý máselesine erekshe nazar aýdaryldy. Quryltaı 145 depýtattan turady. Usynylyp otyrǵan ózgerister bılik júıesiniń teńgerimdi bolýyn qamtamasyz etip, azamattardyń el basqarýyna qatysý tetikterin keńeıtetini aıtyldy.
Eń kóp talqylanǵan máselelerdiń biri – medısınalyq kómek taqyryby boldy. Stýdentter «joba bilikti medısınalyq kómekke quqyqty jetkilikti deńgeıde qamtamasyz ete me?» jáne «nege mátinde burynǵy redaksııamen salystyrǵanda ózgeshe tujyrym qoldanylǵan?» degen suraqtar qoıdy.Spıkerler memleket tarapynan medısınalyq kómek kórsetý kepildikteri saqtalatynyn túsindirdi. Áńgime azamattarǵa usynylatyn kepildendirilgen medısınalyq kómek kólemi, sondaı-aq el aýmaǵynda júrgen barlyq adamdarǵa, onyń ishinde sheteldikterge de kórsetiletin shuǵyl kómek týraly bolyp otyr. Tujyrymdardyń ózgerýi memlekettik mindettemelerdi joıý emes, quqyqtyq naqtylaýlarmen baılanysty ekeni aıtyldy.
Kezdesý barysynda medısınalyq qyzmetkerlerdiń quqyqtyq qorǵalýy, bolashaq dárigerlerdiń tek klınıkalyq emes, sonymen qatar kásibı qyzmetiniń quqyqtyq qyrlaryn da meńgerý qajettiligi talqylandy. О́z quqyqtary men mindetterin túsinbeıinshe, saýatty kásibı qyzmetti qalyptastyrý múmkin emestigi atap ótildi.
Medısınadaǵy dinı aspektiler týraly da suraqtar qoıyldy. Qatysýshylarǵa memlekettiń zaıyrly bolyp qala beretini, al Konstıtýsııa normalary azamattardyń teńdigin jáne ar-ojdan bostandyǵyn bekitetini túsindirildi. Bul qoldanystaǵy zańnama aıasynda osyndaı jaǵdaılardy quqyqtyq turǵyda retteýge negiz bolatyny aıtyldy.
Ǵylym men bilimniń mańyzyna da erekshe toqtaldy. Spıkerler joba adam kapıtalyn damytýǵa, akademııalyq orta men ǵylymı qyzmetke basymdyq beretinin jetkizdi. Olardyń pikirinshe, bul ýnıversıtet qaýymdastyǵy men bolashaq mamandar úshin mańyzdy belgi.
Kezdesý sońynda qatysýshylarǵa 15 naýryzda ótetin referendým týraly eske salynyp, jobanyń mátinimen óz betinshe tanysyp, sanaly túrde daýys berýge qatysýǵa shaqyryldy. Uıymdastyrýshylar qazirgi kezeń tarıhı sát ekenin, onda jastar baqylaýshy emes, konstıtýsııalyq úderistiń tolyqqandy qatysýshysyna aınalatynyn atap ótti.