Ulttyq banktiń málimetinshe, bıylǵy jyldyń qańtar aıynda depozıttik uıymdardaǵy salymdar bir aıda 3,75% -ǵa tómendep, 46,2 trln teńgeni qurady. Jınaqtyń eń kóp úlesi teńgemen saqtalady – 36,2 trln teńge. Alaıdy 2025 jyldyń jeltoqsanmen salystyrǵanda olardyń kólemi 4,5%-ǵa qysqarǵan. Al shetel valıýtasyndaǵy salymdar 9,5 trln teńge (bir aıda -5,9%) qurap otyr, dep jazady Egemen.kz.
Klıentter bólinisine úńilsek, jeke tulǵalardyń salymdaryndaǵy qarajattyń basym bóligi – shamamen 26 trln teńgeni (-0,8%) qurap otyr. Al banktik emes zańdy tulǵalarǵa tıesili úles 20,2 trln teńgege (-7,3%) teń. Osy oraıda «BCC Invest» brokerlik kompanııasynyń sarapshylary ózderiniń ekonomıkalyq sholýynda el azamattary úshin jınaqtardy tek depozıtte saqtamaı, oblıgasııalarǵa salý tıimdirek ekenin alǵa tartady. Mamandardyń paıymynsha, teńgemen jáne valıýtamen nomınırlengen oblıgasııalar boıynsha paıyzdyq mólsherlemeler búginde depozıttik mólsherlemeden joǵary bolyp otyr.
2026 jyly jınaqty qaı valıýtada saqtaǵan tıimdi?
Sarapshylardyń aıtýynsha, 2025 jyldyń úshinshi toqsanynyń sońynda merzimsiz depozıtter boıynsha paıyzdyq mólsherlemeler onyń merzimine qaraı 15% deńgeıinde qalyptasqan. Al merzimdi jáne jınaq depozıtterine kelsek, tolyqtyrý quqyǵynsyz salymdar boıynsha mólsherleme 10,5-18,1% aralyǵyn, al tolyqtyrý múmkindigi qarastyrylǵan jınaqtar boıynsha 11,8-17,6%-dy quraǵan.
«Tek saqtap qana qoımaı, sonymen qatar kóbirek ıkemdilik pen áleýetti kiristilik alǵysy keletin ınvestor úshin oblıgasııalar túrindegi balamalar kóbinese senimdirek kórinedi», delingen BCC Invest sholýynda. KASE-tegi korporatıvtik oblıgasııalardyń kiristiligi teńgemen jyldyq 13,61-25%, al dollarmen 4,5-10% aralyǵynda qubylyp tur. Bastapqy naryqtaǵy oblıgasııalardyń basym bóligi usynatyn tabys mólsherlemesi dástúrli depozıttik stavkalardan áldeqaıda joǵary. Bul úrdis, ásirese, joǵary tabysty shyǵarylymdar segmentinde aıqyn baıqalady. Sarapshylardyń paıymynsha, eger bankter naqty kiris mólsherlemesin bekitse, oblıgasııalar ınvestorǵa merzimine qaraı qosymsha syılyqaqy alýǵa jol ashady.Teńgelik depozıtter boıynsha paıyz ósti: salymshylar neni eskerý kerek?
Sonymen qatar mamandar depozıtterdiń tıimdiligi qarajatty paıdalaný múmkindigine tikeleı baılanysty ekenin alǵa tartady. Máselen, paıyzy joǵary jınaq depozıtteri salymdy merziminen buryn alýǵa shekteý qoıady, ári bul jaǵdaıda klıent jınaqtalǵan syıaqysynan aırylyp qalýy múmkin. Al oblıgasııalar naryqtaǵy ıkemdilikti saqtaı otyryp, qundy qaǵazdy satý nemese óteý arqyly qarjyny erte shyǵaryp alýǵa múmkindik beredi. BCC Invest sarapshylarynyń pikirinshe, oblıgasııalardyń taǵy bir artyqshylyǵy – táýekelderdi ártaraptandyrý áleýetinde. Investor óz portfelin túrli emıtentter men merzimder arasynda bólý arqyly qarjylyq qaýipsizdigin nyǵaıta alady. Budan bólek, elimizdegi valıýtalyq depozıtterdiń kiristiligi, ádette, 1%-dan aspaıdy. Al dollarlyq oblıgasııalar jyldyq 10%-ǵa deıin tabys usyna alady. Osyǵan baılanysty sarapshylar valıýtalyq depozıtti tabys quraly emes, tek «valıýtalyq seıf» retinde qarastyrýdy usynady.