Qazaqstannyń bank sektoryndaǵy nesıelendirý qarqyny báseńdegenimen, halyqtyń borysh júktemesine qatysty alańdaýshylyq seıilmeı tur. Sarapshylardyń eskertýinshe, aldaǵy jyly bankter úshin eń álsiz tus – tutynýshylyq nesıeler bolýy yqtımal. 2026 jylǵa arnalǵan bank sektory boıynsha boljamynda S&P Global Ratings dál osy baǵytta táýekeldiń kúsheıýi múmkin ekenin atap ótti, dep jazady Egemen.kz.
Agenttiktiń málimetine súıensek, qazir jaǵdaı kúrdeli emes. Bankter táýekeldi baqylaýda ustap otyr. Alaıda tutynýshylyq nesıelerdiń ósý qarqyny baıaýlaıdy. 2026 jyly ol 18-20% shamasynda bolýy múmkin. Soǵan qaramastan, halyqqa beriletin nesıeler bank sektoryndaǵy negizgi qozǵaýshy kúsh bolyp qala beredi.
Sarapshylar ósimniń baıaýlaýy bankter úshin belgili bir deńgeıde paıdaly deıdi. Sebebi tabysy tómen azamattardyń qaryzy tym kóbeıse, qıyn kezeńde bankter shyǵynǵa batady. Mundaı jaǵdaıda olar qaıtpaı qalýy múmkin nesıelerge qosymsha rezerv jınaýǵa májbúr bolady.
S&P Global Ratings boljamynsha, 2026 jyly tólemi keshiktirilgen tutynýshylyq nesıelerdiń úlesi 5,5-6%-ǵa jetýi múmkin. Bul 2025 jylmen salystyrǵanda sál joǵary kórsetkish. Buǵan nesıeler merziminiń qysqarýy jáne olardyń «eskirýi» sebep. Sonymen birge halyqtyń jalpy qaryz júktemesi de ulǵaıyp keledi. Bul bankterdiń qarjysyna qosymsha salmaq túsiredi.
Sonymen qatar bankterdiń tabysy áli de jaqsy deńgeıde saqtalady. Agenttik dereginshe, taza paıyzdyq marja 2025 jyly shamamen 7% boldy. Bul bankterdiń paıda tabýyna múmkindik berip otyr.
Al Ulttyq bank málimetinshe, 2025 jyly elimizdegi bankterdiń jıyntyq paıdasy 2,7 trln teńgege jýyqtady. Bul bir jylda 7%-ǵa jýyq ósim bar ekenin kórsetedi. Degenmen ósim qarqyny burynǵydan baıaý. 2024 jyly bank sektorynyń paıdasy 17%-ǵa artqan bolatyn.
Aldaǵy ýaqytta bankter úshin basty másele – halyqty nesıemen qamtı otyryp, qaryzdyń shamadan tys ósýine jol bermeý. Al qaryz alýshylar úshin negizgi qaǵıda bireý: nesıe alarda óz múmkindigin naqty esepteý qajet.