Mańǵystaý oblysynda dárigerlerdiń bilimi men biligin arttyrý baǵytyndaǵy túrli basqosý, semınar, tájirıbelik sabaq jıi uıymdastyrylady. Jaqynda oblystyq kópbeıindi aýrýhanasynyń bazasynda ýrologııa, onkoýrologııa salasyndaǵy ozyq ádisterdi tájirıbede qoldanýǵa arnalǵan sheberlik saǵaty ótti.
Saǵat barysynda ýrolog dárigerler ýrologııa salasyndaǵy eń ozyq, az ınvazıvti tehnologııalardyń biri sanalatyn retrogradty ıntrarenaldy hırýrgııa (RIRS) ádisimen, jumsaq ýreterorenoskop «MacroLux» apparatynyń kómegimen búırek tastaryn alý operasııasyn jasady. Árbir operasııa shamamen bir saǵatqa sozyldy.
Dárigerlerdiń aıtýynsha, operasııa barysynda qoldanylǵan «MacroLux» apparaty – sońǵy býyndaǵy fleksıbldi ýreterorenoskop. Onyń basty artyqshylyǵy – óte juqa ári ıkemdi qurylymy. Apparat búırektiń qoljetimi qıyn bólikterine deıin erkin jetýge múmkindik beredi. Sondaı-aq hırýrgke operasııa aımaǵyn dál baqylaýǵa jaǵdaı jasaıdy. Bul óz kezeginde hırýrgııalyq manıpýlıasııalardyń qaýipsizdigin arttyryp, naýqas aǵzasyna túsetin júktemeni azaıtady. Nátıjesinde, operasııa ýaqyty qysqaryp, asqyný qaýpi tómendeıdi, pasıenttiń tez qalpyna kelýine múmkindik týady.
Sheberlik saǵatyna Qaraǵandy medısınalyq ýnıversıtetiniń qaýymdastyrylǵan professory, medısına ǵylymdarynyń kandıdaty, Qaraǵandy oblysynyń shtattan tys bas ýrologi Serik Júnisov arnaıy shaqyrýmen kelip, Mańǵystaý oblysynyń shtattan tys bas ýrologi, aýrýhananyń ýrologııa bólimi meńgerýshisi Murat Bekhojın, ýrolog dárigerler Arman Nabıturdyev, Aqyn Qudaıbergen, «SofieMed», «Iаsın», №2 emhanasy dárigerleriniń qatysýymen kúrdeli operasııalardy oryndaý tájirıbesin bólisti.
Semınar barysynda jeti naýqasqa mindetti áleýmettik medısınalyq saqtandyrý júıesi sheńberinde tegin operasııa jasaý josparlanǵan, operasııalar joǵary mamandandyrylǵan medısınalyq kómek talaptaryna saı júrgizilip jatyr. Sondaı-aq aýrýhana bazasynda onkoýrolog dárigerlerdiń qatysýymen ótetin sheberlik saǵatynda ýrologııalyq, onkologııalyq aýrýlardy emdeýdiń zamanaýı hırýrgııalyq tásilderi kórsetiledi. Bul baǵyttaǵy operasııalar dárigerler tájirıbesin arttyryp qana qoımaı, óńirde onkoýrologııalyq kómektiń sapasyn jańa deńgeıge kóteredi.
«Mundaı sheberlik synyptary óńirlik aýrýhanalarda joǵary tehnologııalyq operasııalardy engizýge, mamandardyń kásibı deńgeıin kóterýge, turǵyndarǵa kórsetiletin medısınalyq kómektiń sapasyn arttyrýǵa septigin tıgizedi», deıdi basqosýǵa qatysýshy dárigerler.
Mańǵystaý oblysy