Aýyl mektebi – aımaqtyń bolashaǵy. Aıagóz aýdanyna qarasty Qopa aýylyndaǵy S. Seıfýllın atyndaǵy jalpy orta bilim beretin mektepte júzege asqan keshendi jańǵyrtý sonyń aıqyn dáleli. Jýyrda Aqtoǵaı kásipornynyń demeýshiligimen aýyl mektebiniń aýmaǵy abattandyrylyp, materıaldyq-tehnıkalyq bazasy jańartyldy, dep habarlaıdy Egemen.kz.
Atalǵan is-sharaǵa arnaıy qatysqan Aıagóz aýdanynyń ákiminiń mindetin atqarýshy Aıbek Nuǵymarov atqarylǵan jumystar týraly aıtyp berdi.
«Qopa aýylyndaǵy S. Seıfýllın atyndaǵy jalpy orta bilim beretin mekteptiń aýlasy abattandyrylyp, ınfraqurylym nysandary ornatyldy. Shaǵyn ortalyqqa qajetti jaǵdaı jasaldy. Sonymen qatar bilim berý uıymynyń materıaldyq-tehnıkalyq bazasy jańartylyp, tehnologııa, fızıka jáne hımııa kabınetteri zamanaýı qural-jabdyqtarmen jabdyqtaldy. Interaktıvti panelder, mádenı is-sharalar zalyna arnalǵan jabdyqtar tolyqtyryldy. Jańǵyrtylǵan mektep ǵımaraty men aýlasy oqýshylar úshin qaýipsiz ári jaıly bilim alý ortasyn qamtamasyz etýge baǵyttalǵan. Bul jumystarǵa demeýshilik jasap otyrǵan jáne jalpy aımaq kóleminde áleýmettik jaýapkershilik aıasynda qoldaý kórsetip kele jatqan Aqtoǵaı KAZ Minerals kompanııasyna alǵyz bildiremiz», deıdi A.Nuǵymarov.
Byltyr 29 jeltoqsanda mektepte jańa oqý kabınetteri ashylǵan. Uldar men qyzdarǵa arnalǵan zamanaýı eńbek kabınetteri, tolyq jabdyqtalǵan hımııa jáne fızıka kabınetteri, sondaı-aq jasandy ıntellekt kabıneti paıdalanýǵa berilgen edi. Barlyq oqý keńistigi qazirgi bilim berý standarttaryna saı jasaqtalyp, tájirıbelik oqytýǵa beıimdeldi.
Aqtoǵaı ken ornynyń bas dırektory Entonı Todd myrza bul bastamanyń mánin áleýmettik jaýapkershilik aıasynda jasalyp jatqan jumys ekenin atap ótti.
«Biz jumys istep jatqan óńirlerde tek óndiristik kórsetkishterge ǵana emes, jergilikti qaýymdastyqtardyń damýyna da basymdyq beremiz. Qopa aýylyndaǵy mektepti jańǵyrtý – bolashaq mamandardy tárbıeleýge qosqan úlesimiz dep bilemiz. Zamanaýı zerthanalar men tehnologııalyq kabınetter oqýshylardyń qyzyǵýshylyǵyn arttyryp qana qoımaı, olardyń bolashaq kásibı baǵdaryn aıqyndaýǵa múmkindik beredi. Bilimge salynǵan ınvestısııa – óńirdiń ornyqty damýynyń negizi», deıdi ol.
Onyń sózinshe, ınvestısııa óndiristen túsken tabystyń bir bóligi retinde emes, óńirlik damýdyń ózegine aınalǵan. Bul – adam kapıtalyn qalyptastyrýǵa baǵyttalǵan uzaq merzimdi saıasat.
Aýyl mektebiniń zamanaýı formatqa kóshýi – jastardyń sapaly bilim alýyna jol ashpaq. Aýyl mektebi jańarsa – aýyldyń bolashaǵy nyǵaıa túseri sózsiz. Osy rette aýyl turǵyndary da jasalyp jatqan ıgi jumystarǵa aǵynan aqtarylyp alǵystaryn jetkizdi.