Qasıetti Ramazan aıy kirdi. Bul aı berekege toly deıdi ıslam ǵalymdary. Bereke darymaǵan ómirdiń máni bolmaıdy. Bereke – ómirimizdiń barlyq salasyna qajet. «Berekeli bolsa el, Jaǵasy jaılaý ol bir kól...» deıdi Abaı atamyz.
Mysyrlyq úlken ǵalym Shabaq ál-Álýka óziniń «Berekeniń mańyzy» atty kitabynda «Bereke – ıgiliktiń ornyǵýy. Eger bereke az nársege darysa, ol kóbeıedi, kóp nársege darysa, paıdaly bolady. Berekesi joq nárseniń esh máni bolmaıdy», deı otyryp, berekeniń mańyzyn bes topqa jiktep túsindirgen eken.
О́mirdegi bereke. Biz turmystyń barlyq túrinde, úıimizden bastap, otbasy, tamaq, sýsyn, jumys, qarjy, bilim, ýaqyt pen ómirimizdiń árbir bóligine deıin berekege muqtajbyz. Bereke aqsha, ýaqyt, rızyq nemese densaýlyq bolýy múmkin. Adam ómirindegi berekeniń mańyzy – ıgilik pen jaqsylyqtyń artýy hám paıda ákelýi, otbasyndaǵy tatýlyq hám syılastyq. Ýaqyt berekesi. Bul – asa mańyzdy dúnıe. Ýaqyttyń berekesin ıgergen adam ómir súrýdiń jaqsy daǵdysyn qalyptastyra alady. Mysaly, keıbir adamdar 10 saǵat uıyqtasa da demalmaıdy, al keıbireýler 5 saǵat uıyqtap oıanǵanda ózin sergek sezinedi. Paıǵambarymyz (s.ǵ.s) tańǵy ýaqytta bereke bar degen. Bunyń maǵynasy – osy ýaqytta adam kóp jaqsy nárse jasaı alady degen sóz. Rızyqtaǵy bereke. Bul rızyqtyń jetkilikti bolýy. Mysaly, keıbir adamdar mol tabys tabady, biraq aıdyń sońynda qaryzdar bolyp qalady, al bireýler az tabys tapsa da, sol tabysy ómir súrýge jetedi. Berekeli aqsha degenimiz – az qarajatpen kóp nárse jasaý. Bilimdegi bereke. Siz oqyǵan hám ıgergen bilimińizdi paıdalanyp, sol arqyly tynysh hám qadirli ómir súrseńiz, bul – berekeli bilim. Shyn máninde, berekeli bilim – paıda ákeletin bilim, al paıdasyz bilim berekesiz bolady. Úıdegi bereke. Bul úıdiń keń nemese jaıly bolýy emes. Keıbir úlken úılerde bereke joq, al shaǵyn úılerde bereke kóp bolady. Úıde bereke bolǵanda, ol jerge perishteler kiredi, shaıtan olardan qashady. Sol úıde qaıyr men jaqsylyq kóp bolady.