Qaraǵandyda ótken oblystyq jekpe-jek jarysynan keıin 18 jastaǵy Arslan Atymtaev jansaqtaý bólimine tústi. Jas sportshynyń týystary týrnır uıymdastyrýshylarynyń áreketine narazylyq bildirip, polısııaǵa aryz jazdy, dep jazady Egemen.kz KTK telearnasyna silteme jasap.
18 jastaǵy Arslan Atymtaevqa mıyna kúrdeli ota jasalǵan. Alaıda onyń jaǵdaıy áli de aýyr kúıinde qalyp otyr.
Sportshynyń týystary quqyq qorǵaý organdaryna júginip, qylmystyq is qozǵaldy. Olar jaýapkershilikti Arslannyń qarsylasyna emes, týrnır uıymdastyrýshylaryna júkteý kerek dep esepteıdi.
Arslannyń apasy Baqytjan Qalıevanyń aıtýynsha, jekpe-jek kezinde tyıym salynǵan ádis qoldanylǵany týraly eskertýler bolǵan. Onyń sózinshe, sportshy basymen qulaǵan sátte tóreshiler jekpe-jekti dereý toqtatyp, onyń jaǵdaıyn tekserýi tıis edi.
«Bala basymen qulaǵan kezde olar jekpe-jekti toqtatyp, jaǵdaıyn baǵalaýǵa mindetti bolatyn. Alaıda uıymdastyrýshylar, jattyqtyrýshy men tóreshiler jaýapkershilikten jaltaryp otyr», deıdi ol.
Týystarynyń aıtýynsha, jedel járdem shaqyrylmaı, sportshyny aýrýhanaǵa jeke kólikpen jetkizgen. Sonyń saldarynan medısınalyq kómek der kezinde kórsetilmedi dep sanaıdy olar. Sonymen qatar, jetkizilgen medısınalyq mekemede neırohırýrg bolmaǵan. Mamandy basqa klınıkadan kútip, operasııa jasaýǵa shamamen úsh saǵat ketken.
Al jarys uıymdastyrýshylary barlyq áreket reglamentke sáıkes júrgizilgenin aıtyp, kináni moıyndamaı otyr. Qaraǵandy oblystyq jekpe-jek federasııasynyń prezıdenti Ádilet Nurmadıev bul ádis tyıym salynǵan tásilge jatpaıtynyn málimdedi. Onyń aıtýynsha, bas tóreshi jekpe-jekti Arslan tarapynan belsendi áreket bolmaǵandyqtan toqtatqan.
Hromtaýda gaz jaryldy: 5 adamdy kúıik shaldy, bir adam jansaqtaý bóliminde jatyr
Qazirgi tańda qylmystyq is qozǵaldy. Zań boıynsha jaýapkershilik sportshynyń qarsylasyna júktelýi múmkin. Alaıda jábirlenýshi tarap jattyqtyrýshy men tóreshilerdiń de áreketine quqyqtyq baǵa berýdi talap etip otyr.
Almaty-2 temirjol beketinde 52 adam tabıǵı gazdan ýlandy: eki bala jansaqtaý bóliminde