Memlekettik qyzmetterdiń qoljetimdiligi men sapasyn arttyrýdy kózdeıtin saıasat aıasynda Sıfrlyq damý jáne jasandy ıntellekt mınıstrligi memlekettik organdar jáne «Azamattarǵa arnalǵan úkimet» memlekettik korporasııasymen birlesip, eń kóp suranysqa ıe qyzmetterdi sıfrlyq formatqa kóshirý jumysyn júıeli túrde júrgizip keledi. Nátıjesinde azamat pen memleket arasyndaǵy qarym-qatynas birtindep qashyqtan, yńǵaıly ári ashyq formatqa aýysyp jatyr, dep jazady Egemen.kz.
Bul úderiste Halyqqa qyzmet kórsetý ortalyqtary arqyly jıi kórsetiletin TOP-10 qyzmetke basymdyq berilgen. Atalǵan qyzmetter front-ofısterdegi jalpy ótinishterdiń shamamen 80 paıyzyn quraıdy. Olardy onlaın formatqa kóshirý kezekterdi qysqartýǵa, azamattardyń ýaqytyn únemdeýge jáne rásimderdiń ashyqtyǵyn arttyrýǵa baǵyttalǵan.
Sonyń ishinde elektrondyq sıfrlyq qoltańba qyzmeti tolyqtaı onlaın formatqa aýystyryldy. 2025 jyldyń tamyzynan bastap ESQ alý úshin HQO-ǵa barý qajet emes. О́tinish berý jáne qoltańbany alý mindetti bıometrııalyq sáıkestendirý arqyly qashyqtan júzege asady.
Endi HQKO-dan qujatty táýliktiń kez kelgen sátinde alyp ketýge bolady
Qashyqtan qyzmet alýǵa degen suranys bul sheshimge deıin-aq qalyptasqan. 2025 jyldyń qańtar men tamyz aılary aralyǵynda 26,7 mln ESQ onlaın rásimdelse, 1,2 mln qoltańba ǵana HQO arqyly berilgen. Iаǵnı, qoltańbalardyń shamamen 96 paıyzy qashyqtan alynǵan, al oflaın ótinishterdiń úlesi 4 paıyzdy quraǵan. 2026 jyldyń qańtarymen salystyrǵanda bul úrdis odan ári kúsheıip, búginde azamattardyń 99,6 paıyzdan astamy ESQ-ny onlaın formatta alýdy tańdaıdy.
Áleýmettik faktorlar da nazardan tys qalǵan joq. Eger azamat bıometrııalyq sáıkestendirýden bes ret óte almasa, qyzmetti HQO operatory arqyly oflaın alý múmkindigi saqtalady. Bul jaǵdaıda qosymsha fototúsirilim júrgizilip, jeke bas derekteri moderator tekserisinen ótedi.
Turǵyn úı kezegi qalaı jumys isteıdi?
Sonymen qatar jańa mehanızm mobıldi abonenttik nómirler týraly málimetterdi ózektendirýge jol ashty. Bul SIM-kartalardy tirkeý jónindegi zań talaptaryn oryndaýǵa, nómirlerdiń úshinshi tulǵalar tarapynan qoldanylýyn azaıtýǵa jáne sıfrlyq qaýipsizdikti kúsheıtýge yqpal etip otyr.
Turǵylyqty mekenjaıy boıynsha tirkelý qyzmeti de tolyqtaı sıfrlyq formatqa kóshirildi. 2025 jyldyń 19 qarashasynan bastap bul qyzmet eGov portaly, eGov Mobile mobıldi qosymshasy jáne bank qosymshalary arqyly ǵana qashyqtan kórsetiledi. Sıfrlandyrý ómirlik jaǵdaılardy da qamtydy: qamqorshylar, qorǵanshylar jáne jaldamaly páterde turatyn azamattar burynǵydaı HQO-ǵa baryp, qaǵaz qujat tapsyrmaı-aq, tirkeý rásimin onlaın oryndaı alady.
«Bizdiń basty mindetimiz – azamattyń memleketpen ózara áreketin birtutas ári tehnologııalyq etý. Búgin kóptegen adamdar ESQ rásimdeýde sıfrlyq joldy tańdaǵanyn kórip otyrmyz. Bul tek ýaqytty únemdeý emes, bul elimizdiń qaýipsiz sıfrlyq ekojúıesiniń negizi. TOP-10 qyzmetti onlaın formatqa kóshirý resýrstardy basqarý modelin qaıta qaraýǵa múmkindik berdi. Bosatylǵan áleýet ınnovasııalyq servısterdi damytýǵa jáne jasandy ıntellekt sheshimderin engizýge baǵyttaldy», dedi Sıfrlyq damý jáne jasandy ıntellekt vıse-mınıstri Rostıslav Konıashkın.
Statıstıka da bul ózgeristiń naqty nátıjesin kórsetedi. 2024 jyly HQO operatorlary arqyly 15,2 mln memlekettik qyzmet kórsetilse, 2025 jyly bul kórsetkish 13 mıllıonnan sál asty. Iаǵnı jeke ótinishter sany 2 mıllıonǵa nemese 13 paıyzǵa azaıyp, qyzmet alýshylardyń basym bóligi eGov portaly, eGov Mobile qosymshasy jáne ózine ózi qyzmet kórsetý aımaqtaryna aýysqan.
Endi merzimi ótken júrgizýshi kýáligin onlaın aýystyrýǵa bolady
Jalpy, qolǵa alynǵan sharalar turaqty sıfrlyq memlekettik modeldi qalyptastyrýǵa baǵyttalǵan. Qyzmetter jyldamyraq ári túsinikti bola túsip, únemdelgen resýrstar tehnologııalyq ınfraqurylymdy damytýǵa jáne jasandy ıntellekt salasyndaǵy zamanaýı sheshimderdi engizýge jumsalyp jatyr.