Syrtqy ister mınıstrligi Taıaý Shyǵys elderine saparmen barǵan qazaqstandyqtardyń kezekti legi elge aman-esen oralǵanyn habarlady. Jolaýshylar búgin «Air Astana» áýe kompanııasynyń ushaǵymen Aqtaý halyqaralyq áýejaıyna qondy, dep jazady Egemen.kz.
Ushyp kelgen azamattardyń basym bóligi ári qaraı Almaty qalasyna jol tartqan. Azamattar shetelde bolǵan kezeńde elimizdiń Syrtqy ister mınıstrligi men elshilikter tarapynan turaqty baılanys ornatylyp, jan-jaqty qoldaý kórsetilgenin atap ótti. Arnaıy chattar ashylyp, aqparattyq jáne quqyqtyq kómek berilgen. Qonaq úı men tamaq máselesi de sheshimin tapqan.
«Biz Saýd Arabııasy, Jıdda, Doha, Katar baǵyttarynan jınalyp, Ýmra saparynan keıin Jıdda qalasyna toptastyryldyq. Sol jerden uıymdastyrylǵan reıspen Aqtaýǵa jettik. 2-3 kún kidirgenimiz bolmasa, jaǵdaıymyz jaqsy boldy. Syrtqy ister mınıstrligi men elshiler tolyq qoldaý kórsetti. Qujat rásimdeý barysynda da kómektesti. Osyndaı sátte elimizdegi tynyshtyq pen táýelsizdiktiń qadirin tereńirek túsinedi ekensiń. Qazaq halqyna, Memleket basshysyna alǵys aıtqym keledi. Qazaqstandyqtarǵa birlik tileımin. Elimiz aman, jurtymyz tynysh bolsyn. Aspanymyz ashyq bolsyn», dedi Aqtaý qalasynyń turǵyny Bırıýza Ishanova.
Taıaý Shyǵys elderinen Qazaqstan azamattaryn elge qaıtarý jumystary jalǵasyp jatyr. Mınıstrlik málimetinshe, Taıaý Shyǵystan elge oralǵan azamattardyń sany 2 151 adamǵa jetip otyr.
Eske sala keteıik, Izraıl 28 aqpan, senbi kúni tańerteń Iranǵa soqqy jasady. Dýbaı, Abý-Dabı jáne Ras-el-Haımada júrgen Qazaqstan azamattary reısterdiń toqtatylýyna baılanysty elge qaıta almaı otyr. Al «Qazposhta» Taıaý Shyǵystaǵy jaǵdaıdyń shıelenisýine baılanysty halyqaralyq poshta jóneltilimderine ýaqytsha shekteýler qoıylǵanyn málimdedi.
Buǵan deıin Taıaý Shyǵystaǵy qaqtyǵys saldarynan 13 reıs toqtatylǵanyn jazǵan bolatynbyz. Sondaı-aq Taıaý Shyǵystaǵy ahýaldyń ýshyǵýyna baılanysty Qazaqstannyń shet elderdegi mekemeleriniń jedel baılanys jáne «jedel jeli» nómirleriniń iske qosylǵany habarlanǵan edi.
Keshe Dýbaıdan Oman arqyly 467 otandasymyz elge jetkizildi. Sonymen qatar Flydubai áýe kompanııasy Dýbaı qalasynan Astana jáne Almaty qalalaryna eki evakýasııalyq reısti oryndady.