Aqmolanyń astanalyq óńiri Selınograd aýdanynyń Tastaq stansasy qasyndaǵy osy bir kenish kópten beri qolǵa alynǵanymen, tolyqqandy ıgerilmeı kelip edi. Halyqaralyq«Heidelberg Cement» tobyna kiretin «Bektas grup» JShS ony tolyqtaı óz ıeligine ótkizbeı turyp, geologııalyq jan-jaqty zertteý júrgizip, bul jerdegi tastyń kólemi 25 jylǵa deıin jumys orny bolatynyna kóz jetkizgen. Onyń ústine tabıǵı tastyń qattylyǵy, ǵalymdardyń pikirinshe, barlyq iske jaramdy bop shyqty. – Bizdiń kompanııa Qazaqstan aýmaǵynda 2005 jyldan beri jumys istep jatyr, – dedi seriktestik dırektory Sergeı Pchelınsev. – Bizben úzeńgiles bir maqsatta jumys istep jatqan seriktes kásiporyndar da osy qazaq elinde jeterlik. «Buqtyrma sement», «Kaspıı Sement», «BaıKazBeton» kompanııalary solardyń aldyńǵy qatarlarynda tur der edim. Osy nemis kompanııasy kelgenge deıin bul jerde qýaty mardymsyz «Bektas grup» seriktestigi jumys istep kelgen. О́ndiristik ónimdiligi shamaly bolǵannan keıin olar naryq synaǵyna toıtarys bere almaǵan. Nemistiń «Heidelberg Cement» kompanııasy álemniń 40 elinde jumys istep jatyr. Qıyrshyq tas óndirisi boıynsha olar dúnıejúzinde birinshi oryndy, al beton men sement boıynsha 3-shi oryndy ıelenip otyr. Bir sózben aıtqanda, adymy alshań, beli jýan irgeli kásiporyn. Olar osy jerde iske kiriskennen beri jańa óndiristiń qýaty artty. Qazaqstan zańnamasy aıasynda olar jergilikti eldi mekenderdiń áleýmettik baǵdarlamalaryna da atsalysýdy jón sanapty. Ekologııa máselesi de árqashanda olardyń oıynda júredi. Sol sebepti, bul jerdegi burynǵy álsiz eski qural-jabdyqtar tolyqtaı joıylyp, onyń ornyna qýatty sheteldik jabdyqtar ákelindi. Álemdik standarttar sharttaryna sáıkes keletin tehnıkanyń jumysy kórgen kózdi toıyndyrady. 3 iri tas óńdeýshi mashına, 15 jabyq konveıerli tasymal jelisi, 100 tonnalyq elektrondy salmaq ólshegish qurylǵy solardyń biregeıi dese de bolady. – Qazirgi kezde bizdiń zaýytta 34 maman jumys istep jatyr, – dep áńgimesin sabaqtady Sergeı Pchelınsev. – Al olarǵa aspazdardy, júrgizýshilerdi, jumyskerler men taý qoparǵysh mamandardy qossańyz kisi sany 100-den asyp ketedi. Aılyq eńbekaqylary da turǵyndardyń kóńilinen shyǵýda. 100-120 myń teńge aralyǵynda. Buǵan medısınalyq saqtandyrýdy, kıim-keshek, aqysyz tamaqty qossańyz – jaǵdaıdyń jaman emes ekendigin ózińiz de túsinesiz. Jańa zaýyttyń jumysy vahtalyq tásilge eseptelgen. Qıyrshyq tastyń túri 10-nan asady. Kishi fraksııasy 0,5 mm. bolsa, úlkenderi 40 pen 70-tiń arasynda. Astana qalasynyń qulashyn keńge salyp jatqan barlyq qurylysyna, asfalty men temirjolyna taptyrmas materıal osy jerde ázirlenedi. Zaýyttyń ýchaske bastyǵy Igor Grıshın «Qazaqstan Prezıdenti N.Á. Nazarbaevtyń «Nurly Jol» baǵdarlamasy bizge bıznes salasyn órkendetýge keń jol ashyp otyr», dedi. Sebebi, bizdiń memleketimiz Shyǵys pen Batysty qosatyn, bir sózben aıtqanda, toǵyz joldyń torabynda turǵan el. – Kólik logıstıkasyn damytý úshin aldymen jaqsy avtokólik joldary kerek. Bizdiń jumysymyz soǵan negizdelip otyr. Igor Iýrevıchtiń paıymdaýynsha, sapasy joǵary qıyrshyq tasty suraýshy iri qurylys kompanııalary Astanada jetkilikti. Solardyń biri «Biriktirilgen qurylys korporasııasy», «Qurylys konstrýksııasy» aksıonerlik qoǵamy men birneshe temirjol salýshy iri uıymdar eken. Zaýyt iske qosylǵannan beri Tastaq stansasyndaǵy turǵyndarǵa da edáýir kómek kórsetilipti. Birinshiden, aýyz sý tasymaldaıtyn jumys osy kásiporynnyń enshisine tıgen. Ekinshiden, osy kásiporyn bıylǵy kóktemgi sý tasqynynan buzylǵan aýdanaralyq joldardy jóndeý úshin 3 myń tonna tabıǵı tas tasymaldapty. Al, eń bastysy, olar Selınograd aýdanynyń bıýdjetin kóbeıtýge qomaqty úles qosyp otyr. Áńgime barysynda halyqaralyq «Heidelberg Cement» kompanııasynyń bas menedjeri Roman Kempe bul kásiporynnyń aldaǵy ýaqytta Aqmola oblysynyń enshisindegi kóptegen eldi mekenderdiń áleýmettik-ekonomıkalyq damýyna aıtarlyqtaı kómek kórsetetinine senimdi ekendigin jetkizdi. Bul sózdi Tasty aýyldyq aımaǵynyń ákimi Beısenbaı Appasov ta rastap otyr. Sebebi, qys kezinde joldardy tazalaýǵa, aýyzsý jetkizýge zaýyt tehnıkamen, sondaı-aq kisilermen aıtarlyqtaı kómek kórsetipti. Bir sózben aıtqanda, eki jaqqa tıimdi istiń qulash jaıǵanyna jergilikti turǵyndar da rıza. Maman mehanızatorlar men júrgizýshiler osy jerden ózderiniń turaqty jumystaryn tapqan. Bul «Nurly Joldyń» elge berip otyrǵan úlken bir berekesi deýge bolarlyqtaı is.
Janat TÚGELBAEV.
Aqmola oblysy, Selınograd aýdany.