Ertis-Baıan óńirinde óndiristegi jazataıym oqıǵa saldarynan bolatyn kisi ólimi azaımaı tur. Keıingi úsh jylda 20 adam kóz jumǵan.
2023–2025 jyldary óńir kásiporyndarynda 313 jazataıym oqıǵa tirkelgen. Saldarynan 336 adam zardap shekken. Memlekettik eńbek ınspeksııasy komıteti Pavlodar oblysy boıynsha departamentiniń málimetinshe, óńir kásiporyndary men uıymdarynda 2025 jyly 104 jazataıym oqıǵa tirkelip, olardyń saldarynan 113 adam zardap shekken. Onyń ishinde 66 adam aýyr jaraqat alyp, 7 adam ólimi tirkelgen.
«2024 jyly 103 jazataıym oqıǵa tirkelip, 112 adam zardap shekkendigi anyqtalǵan. 78 adam aýyr jaraqattanyp, 9 adam kóz jumǵan. Al 2023 jyly tirkelgen 106 jazataıym oqıǵadan 111 adam zardap shekken (onyń 65-i aýyr jaraqat alǵan). Tórt oqıǵa adam ólimimen aıaqtalǵan. Zardap shekkenderdiń basym bóligi taý-ken – metallýrgııa salasynda, bıýdjettik uıymdarda, shaǵyn bıznes sýbektilerinde, qurylys salasynda tirkelgen. О́ndiristik oqıǵalardyń negizgi sebebi – jumystyń qanaǵatsyzdandyrarlyq deńgeıde uıymdastyrylýy, zardap shegýshiniń abaısyzdyǵy, eńbek qorǵaý men qaýipsizdik talaptarynyń buzylýy», deıdi departament basshysynyń mindetin atqarýshy Abylaı Sabyrov.
Jazataıym oqıǵalarda eń jıi kezdesetini – adamdardyń bıikten qulaýy, qozǵalmaly, kókte qalyqtap júretin, aınalmaly zattar men bólshekterdiń áseri. О́tken jylǵy statıstıkalyq derekterge úńilsek, kásiporyndar arasynda eń kóp jaraqattanǵan jumyskerler «Qazhrom» TUQ» AQ fılıaly – Aqsý ferroqorytpa zaýytyna tıesili – 10 adam. Sondaı-aq «Eýrazııa energetıkalyq korporasııasy» AQ fılıaly – «Shyǵys» kenishinde – 6 adam, «StekloMır KZ» JShS – 4 adam, «Bogatyr Kómir» JShS – 5 adam, «Prommashkomplekt» JShS – 3 adam, «R.W.S. Concrete» JShS – 2 adam, «PETK» AQ – 2 adam, «Smart Avtobýs PV» JShS – 4 adam, «Qazaqstan alıýmınııi» AQ fılıaly elektr stansasynda 2 adam óndiristik jaraqat alǵan. Al 2025 jyly ólimge ákelgen jazataıym oqıǵalar «Bogatyr Kómir» JShS-da tirkelipti – 2 adam qaza tapqan. Sondaı-aq «Stroı-Dızaın PV» JShS, «QAJservıs» JShS, «Qazhrom» TUQ» AQ fılıaly – Aqsý ferroqorytpa zaýyty, «MK Evrazııa-Agro» JShS men «Gamma Sarykól» JShS-nyń árqaısynda kisi ólimimen aıaqtalǵan bir jazataıym oqıǵadan tirkelgen.
Keıingi jyldary tirkelgen eń qaıǵyly oqıǵalardyń biri – 2024 jyldyń qańtar aıynda Maıqaıyń altyn kenishinde avtobýspen qurdymǵa túsip qaza tapqan 4 qutqarýshynyń ólimi. Qutqarýshylar «Kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby» JShS PF mekemesinde eńbek etken edi.
«О́kinishke qaraı, óndiristik jazataıym oqıǵalardan zardap shekken adamdardyń jumys berýshiden keltirilgen materıaldyq zııandy óteý normasy eńbek zańnamasynda qarastyrylmaǵan. Osy sebepti zardap shekkender azamattyq sotqa óz betterimen júginedi. Al qylmystyq ister boıynsha memlekettik eńbek ınspeksııasynyń materıaldary tergeýler aıaqtalǵannan keıin aýmaqtyq polısııa organdaryna joldanady», – dep qosty departament ókili.
Elimizde 2024–2030 jyldarǵa arnalǵan «Eńbek qaýipsizdigi» tujyrymdamasyn iske asyrý boıynsha jumys júrgizilip jatyr. Bul qujat eńbek qaýipsizdigi salasynda jumys berýshilerge qoıylatyn talaptardy ońtaılandyrýǵa baǵyttalǵan sharalar keshenin qamtıdy. Maqsaty – óndiristik jaraqattanýshylyqty tómendetý jáne tıisti memlekettik baqylaýdy qamtamasyz etý.
Departament basshysy óńirde óndiristik oqıǵalardyń aldyn alý jáne kásibı aýrýlardyń profılaktıkasy boıynsha qabyldanatyn sharalar aıasynda 33 kásiporynda «Nóldik jaraqattanýshylyq – Vision Zero» tujyrymdamasy, 22 eńbek uıymynda «Halyqtyq baqylaý» jobasy engizilgenin atap ótti. Bul kásiporyndaǵy eńbek qaýipsizdigin tikeleı baqylaýǵa múmkindik berip otyr. О́ńir kásiporyndarynda 881 óndiristik keńes jumys isteıdi, olardyń mindetine óndiristik jaraqattanýshylyqty boldyrmaý jáne jumys oryndaryndaǵy eńbek jaǵdaılaryn tekserýdi uıymdastyrý kiredi.
Pavlodar oblysy