Bul teleekspedısııany «Qazaqstan-Aqtóbe» telekompanııasy Qazaq handyǵynyń 550 jyldyǵyna oraı uıymdastyrdy. Teleekspedısııa quramyndaǵy shyǵarmashylyq top oblystaǵy 12 aýdandy aralap, tarıhı zertteýler júrgizip, tyń derekterdi taýyp, beınebaıan túsiredi. Bul jumystardyń nátıjesi «Atajurt» baǵdarlamasynda kórsetiletin bolady.
Ǵylymı ekspedısııanyń jetekshisi – tarıhshy Bekarystan Myrzabaı, jobanyń bas demeýshisi – «Kól-Avto-Aqtóbe» kólik ortalyǵy, «Atajurt» baǵdarlamasynyń redaktory, telejúrgizýshi – Erbol Shyma.
– Bıyl Kereı men áz Jánibek negizin qalaǵan Qazaq handyǵyna 550 jyl tolady. Bizdiń ujymnyń uıytqy bolýymen uıymdastyrylǵan teleekspedısııanyń basty maqsaty – osy el ómirindegi eleýli oqıǵanyń óz deńgeıinde atalyp ótilýine úles qosý bolyp tabylady. Bizdiń óńirde qundy jádigerler, tarıhı oryndar óte kóp. Kóneniń kózindeı sol tarıhı oryndardy zerttep, zerdelep, kórermenderge usynýdy maqsat etken ekspedısııa jumysy Alǵa aýdanynan bastalady, – deıdi «Qazaqstan-Aqtóbe» telekompanııasynyń dırektory Raýken Otynshın. Shyǵarmashylyq top óz jumysyn Eset Kókiuly kesenesine baryp, ata rýhyna taǵzym etip, quran baǵyshtaýdan bastady. Odan keıin teleekspedısııa belgili aqyn Iztaı Mámbetovtiń kindik qany tamǵan Tabantal-Besqospa selolyq okrýgine barady. Jospar boıynsha ekspedısııa músheleri ár aýdanǵa bir kúnnen aıaldady. Teleekspedısııanyń ǵylymı jetekshisi Bekarystan Myrzabaı ýaqyttyń tyǵyzdyǵyn, osy az ýaqyttyń ishinde mol málimet jınap úlgerý kerektigin aıtady. Bizdiń oblystyń qaı óńiri bolmasyn, tunǵan tarıh, tolǵan shejire ekenin alǵa tartady. Mysaly, Alǵada áıgili Alash qaıratkeri Ahmet Baıtursynov dáris bergen mekteptiń orny bar ekenin, Alash kóseminiń munda ataqty bolys Ahmetkereı Qosýaqovtyń arnaıy shaqyrtýymen kelgenin jetkizdi. Ol aǵylshyn saıahatshysy Djon Kestldiń Qarǵaly, Jaman Qarǵaly ózenderiniń boıynda birneshe kún aıaldap, qorǵandardy qazǵany týraly derekter bar ekenin de tilge tıek etti. Sondaı-aq, áz Jánibek hannyń aqylshysy bolǵan Asan Qaıǵy babamyzdan qalǵan keremet jyrlardyń halqymyzdyń jadynda saqtalǵanyn eske sala kelip, teleekspedısııa sapary barysynda atqarylar sharýalardyń birqataryna toqtaldy.
Satybaldy SÁÝIRBAI, «Egemen Qazaqstan».
Aqtóbe oblysy.