Elimizde bıznes pen ázirleýshilerge jasandy ıntellekt negizindegi ónimderdi jasaý úshin derekterge jáne esepteý qýattaryna qoljetimdilik ashylady. Bul týraly Qazaqstan Respýblıkasynyń Jasandy ıntellekt jáne sıfrlyq damý mınıstrliginiń ókilderi IT-qaýymdastyqpen ótken ashyq dıalog formatyndaǵy kezdesýde habarlady, dep jazady Egemen.kz.
Kezdesýde startaptar, kompanııalar jáne táýelsiz ázirleýshilerge otandyq JI sheshimderin jasaýǵa múmkindik beretin memlekettik qoldaý quraldary talqylandy.
Jıynda qatysýshylarǵa naryqqa qoljetimdi naqty servıster kórsetildi. «Prezentasııa + demonstrasııa» formaty ázirleýshilerge derekter men esepteý resýrstaryn JI modelderin oqytý jáne iske qosý úshin qalaı qoldanýǵa bolatynyn kórýge múmkindik berdi.
Sıfrlyq damýdyń vıse-mınıstri Dmıtrıı Mýn vedomstvo memlekettik aqparattyq júıeler men ázirleýshiler arasyndaǵy kedergilerdi joıýǵa nazar aýdaratynyn atap ótti.
JI-di oqytýdaǵy jańa qadam
Onyń sózinshe, kompanııalar endi daıyn derekter jınaqtaryn paıdalanyp qana qoımaı, modelderdi oqytýǵa qajet qosymsha derekterdi mınıstrlikten suraı alady.
Eger ónimdi ázirleý úshin naqty derekter jetkiliksiz bolsa, ol týraly suranys qaldyrýǵa bolady, mınıstrlik qajetti aqparatty daıyndaýǵa kómektesedi.
Negizgi quraldardyń biri retinde, mınıstrlik pen «UAT» AQ birlesip jasaǵan, Ashyq Data portaly ataldy. Qazirgi ýaqytta platformada ashyq, qoljetimdi jyljymaıtyn múlik analıtıkasynan bastap, medısınalyq kórsetkishterge deıin 200 derekter jınaǵy ornalastyrylǵan.
Dárigerler JI kómegimen ınsýlt pen onkologııalyq aýrýlardy erte anyqtap jatyr
Onyń ishinde 73 dataset alǵash ret jarııalandy. Derekter apta saıyn jańartylyp, tegin qoljetimdi. Portal –derekteri jeke tulǵaǵa baılanystyrylmaǵan ortalyqtandyrylǵan vıtrına, ol 120-dan astam memlekettik bazany biriktiredi.
Derekterge qosa, ázirleýshilerge neırondyq jelilerdi oqytý úshin esepteý qýattary qajet.
Astana Hub kompanııasy AlemLLM platformasyn tanystyrdy, ol kompanııalarǵa esepteý resýrstaryna ótinish júıesi arqyly qol jetkizýge múmkindik beredi. Kezdesý barysynda qatysýshylarǵa platformany qoldanýǵa qatysty nusqaýlyq kórsetildi.
Sondaı-aq, qatysýshylar JI memlekettik sektorda jáne ekonomıka salalarynda aldaǵy jyldary qalaı qoldanylýy múmkin ekenin talqylady.
Jarııalanǵan IT-josparlar men memlekettik organdardyń bıznes-prosesteri kompanııalarǵa qaı sıfrlyq sheshimderge suranys bolatynyn aldyn ala túsinýge múmkindik beredi.