Soltústik Qazaqstan oblysynyń Mamlıýt aýdanynda respýblıkalyq referendýmda mehanızator, «Qazaqstannyń Eńbek Eri» ataǵynyń ıegeri Murat Qarajumanov óz tańdaýyn jasady, dep habarlaıdy Egemen.kz.
Ol №353 referendým ýchaskesine Bekseıit aýylyna jubaıymen, balalarymen jáne jıen-nemerelerimen birge ulttyq kıim kıip keldi. Bul kúnniń erekshe atmosferasyn dombyranyń úni tolyqtyrdy.
Soltústik Qazaqstan oblysynyń Mamlıýt aýdanyndaǵy Qarajumanovtardyń eńbek áýleti – urpaqtar sabaqtastyǵy men aýyl eńbegine adaldyqtyń jarqyn úlgileriniń biri. Otbasynyń 30-dan astam múshesi ómirin aýyl sharýashylyǵyna arnaǵan. Olardyń jalpy eńbek ótili 600 jyldan asady. Búginde óńirge tanymal bul áýlettiń ókilderi respýblıkalyq referendýmǵa birlesip qatysty.
Otbasy referendým ýchaskesine tolyq quramda keldi. Birneshe býyn ókilderi el bolashaǵy úshin óz tańdaýlaryn jasaý úshin birge jınaldy. Murat Qarajumanovtyń aıtýynsha, aýylda turyp, eńbek etip júrgen adamdar úshin referendýmǵa qatysýdyń máni erekshe.
«Búgin – elimiz úshin erekshe kún. Biz jańa Konstıtýsııa jobasy boıynsha referendýmǵa qatystyq. Aýyl turǵyndary, eńbek adamdary, eldi azyq-túlikpen qamtamasyz etip, aýyl sharýashylyǵyn damytyp, ata-babamyzdyń dástúrin jalǵastyryp júrgen jandar úshin bul kúnniń mańyzy zor. Men búgin osynda otbasymmen birge keldim. Sebebi eldiń bolashaǵy otbasynan, árbir azamattan bastalady. Búgin jasaǵan tańdaýym aýyldyń damýyna, jarqyn bolashaǵymyzǵa áser etedi jáne bizdiń tańdaýymyz Qazaqstannyń damýyna úles qosady», dedi «Qazaqstannyń Eńbek Eri» ataǵynyń ıegeri Murat Qarajumanov.
Murat Qarajumanov tek Mamlıýt aýdanynda ǵana emes, onyń syrtynda da jaqsy tanymal. Onyń esimi jerdegi adal eńbekpen, aýyl adamdaryna degen qurmetpen jáne kóp jyldan beri búkil otbasy adal qyzmet etip kele jatqan iske degen beriktigimen tyǵyz baılanysty. Qarajumanovtar úshin referendýmǵa qatysý tek azamattyq jaýapkershiliktiń kórinisi ǵana emes, el úshin mańyzdy oqıǵalarǵa árdaıym atsalysyp otyratyn otbasylyq dástúrdiń jalǵasy boldy.
Ýchaskede aýyl turǵyndarynyń belsendiligi jaqsy ekeni aıtyldy. Komıssııa tóraǵasynyń aıtýynsha, adamdar tańerteńnen bastap kelip, daýys berýge joǵary qyzyǵýshylyq tanytyp jatyr.
«Bekseıit aýylyndaǵy №353 referendým ýchaskesinde daýys berý quqyǵy bar 200 azamat tirkelgen. Qazirgi ýaqytta olardyń 60 paıyzdan astamy kelip, óz tańdaýyn jasap úlgerdi. Adamdar daýys berýge belsendi kelip jatyr. Ýchaske saǵat 20:00-ge deıin jumys isteıdi. Sonymen qatar úıde daýys berý úshin 7 ótinish tústi», dedi №353 referendým ýchaskesiniń komıssııa tóraǵasy Jarqyn Kenjetaev.
Qarajumanovtar otbasynyń referendýmǵa qatysýy Soltústik Qazaqstan oblysynda turǵyndardyń ýchaskelerge otbasylarymen birge kelip jatqanyn kórsetetin jarqyn mysaldardyń biri boldy. Kópshilik úshin bul – óz ustanymyn bildirý, urpaqtar birligin, otbasylyq qundylyqtardy qurmetteýdi jáne el bolashaǵyna degen jaýapkershilikti kórsetý múmkindigi.
Ilırdjan Chelıbashı: Jańa Konstıtýsııa demokratııalyq standarttardy jaqsartýǵa yqpal etýi múmkin
Soltústik Qazaqstan oblysynda referendým ótkizý úshin barlyq qajetti jaǵdaı jasalǵan. Daýys berýge 364 767 azamat qatysa alady, onyń ishinde óńirdiń 4145 turǵyny alǵash ret daýys beredi. Oblys boıynsha barlyǵy 581 referendým ýchaskesi jumys isteıdi, onyń 29-y Mamlıýt aýdanynda ornalasqan.
El azamattarynyń 70,98 paıyzy referendýmda daýys berdi