Memleket basshysy referendým ýchaskesinde daýys bergennen keıin jýrnalısterdiń suraqtaryna jaýap bere otyryp, Qazaqstannyń Iran eline qatysty ustanymyn atady, dep habarlaıdy Egemen.kz.
Onyń aıtýynsha, kez kelgen kıkiljiń beıbit jáne dıplomatııalyq jolmen sheshilýi qajet.
«Qazaqstan álemge beıbit el retinde belgili. Kez kelgen qaqtyǵysty dıplomatııalyq jolmen sheshýdi jaqtaımyz. Bul – aınymas ustanymymyz. Taıaý Shyǵysta oryn alǵan jaǵdaıdyń túrli sebebi bar. Men muny jaqynda ótken alqaly jıynda da aıtqanmyn. Rasynda, Shyǵanaqtaǵy arab elderiniń basshylarymen telefon arqyly sóılestim, tilektes ekenimdi jetkizdim. Al Iran Prezıdenti Pezeshkıannyń jaqynda elimizge resmı saparmen kelgenin bilesizder. Sol kezde jaqsy áser qaldyrdy. Ol – zaıyrly kózqarastaǵy adam, ózi kardıohırýrg. Men onyń Iran Shyǵanaq elderine shabýyl jasamaıdy degen málimdemesin quptadym», dedi Prezıdent.
Memleket basshysy Irannyń kórshi elderge soqqy jasaýdy toqtatý týraly sheshimin quptady
Sondaı-aq, ol Iran halqy týraly jyly lebiz bildirdi.
«Biz Iran halqyna, onyń mádenıeti men tarıhyna qurmetpen qaraımyz. Sondyqtan óz ustanymymyzdan aınyǵan joqpyz, árdaıym beıbitsúıgish el bolyp qala beremiz», dedi Memleket basshysy.