«SOSIS-A» Keshendi áleýmettik zertteýler ınstıtýty – Astana» jeke qory jańa Konstıtýsııany qabyldaý jónindegi respýblıkalyq referendým boıynsha júrgizilgen Exit poll nátıjelerin jarııalady. Saýalnamaǵa sáıkes, daýys bergenderdiń basym bóligi Konstıtýsııa jobasyn qoldaǵan, dep habarlaıdy Egemen.kz.
Instıtýt málimetinshe, daýys berý ýchaskelerindegi qatysý deńgeıi 73,8% boldy.
Saýalnamaǵa qatysqan jáne daýys bergen azamattardyń 87,4% jańa Konstıtýsııany qabyldaýdy qoldaǵan.
Eske salaıyq, Qazaqstanda jańa Konstıtýsııa boıynsha respýblıkalyq referendýmdaǵy daýys berý saǵat 20:00-de aıaqtaldy. Qazirgi ýaqytta ýchaskelik komıssııalar daýystardy sanaýǵa kiristi.
Aýmaqtyq komıssııalardyń derekterine sáıkes, eldiń barlyq óńirinde referendýmǵa 9 126 850 qazaqstandyq kelip daýys bergen. Aldyn ala málimet boıynsha, referendýmdaǵy jalpy qatysý deńgeıi 73,24% boldy.
Aıta keteıik, buǵan deıin Eýrazııalyq ıntegrasııa ınstıtýty júrgizgen saýalnama boıynsha Exit poll nátıjesi jarııalandy. Qazaqstandyqtardyń 86,7%-y referendýmda «Iá, qabyldaımyn» dep jaýap bergen.