Kókshetaý qalasynda S-Group qarjy pıramıdasyn uıymdastyrǵan adamdarǵa sot úkimi shyǵaryldy. Olar azamattardan 136 mıllıon teńgeden astam qarjy tartqan, dep habarlaıdy Egemen.kz.
Aqmola oblysynyń soty asa iri mólsherde aqsha tartý arqyly aldyn ala sóz baılasqan adamdar tobynyń qarjy pıramıdasyn qurýy jáne basqarýy faktisi boıynsha úsh adamǵa qatysty qylmystyq isti qarady. Sondaı-aq bir qatysýshyǵa buqaralyq aqparat quraldary men elektrondyq resýrstardy paıdalanyp qarjy pıramıdasyn jarnamalaý, sonyń saldarynan azamattardy tartý jáne olarǵa eleýli zııan keltirý, sondaı-aq asa iri mólsherde alaıaqtyq jasaý aıyptary taǵyldy.
Is materıaldaryna sáıkes, aıyptalýshylardyń biri 2020 jyldyń aqpan aıynan bastap S-Group qarjy pıramıdasyna salymshy retinde qatysyp, odan zańsyz tabys alyp júrgen. Keıin ol Kókshetaý qalasynda osy uıymnyń bólimshesin ashyp, ony basqarǵan.
2020 jyldyń qazan aıynda ol buǵan deıin basqa qarjy pıramıdalaryna belsendi qatysqan taǵy bir áıeldi tartqan. Olar azamattarǵa belgili bir qarjy salǵan jaǵdaıda tabys tabýǵa bolady dep ýáde bergen.
Uıymdastyrýshylar qatysýshylarǵa S-Pharmaceutical brendimen medısınalyq kannabıs óndirý jáne taratý jobasyna, sondaı-aq basqa jobalarǵa ınvestısııa salýdy usynǵan. Sonymen qatar árbir jańa qatysýshyny tartqan adamǵa onyń salymynan 5% syıaqy beriletini aıtylǵan. Qatysý úshin saıtqa tirkelip, keminde 100 dollar salý qajet bolǵan.
Bul qatysýshy buǵan deıin Life Is Good jáne Finiko qarjy pıramıdalaryna qatysyp, sol shemany qaıta qoldanýdy sheshken. Nátıjesinde 59 adam S-Group júıesine tartylyp, 136 mln teńgeden astam qarajat jınalǵan.
Jábirlenýshilerge 300 mln teńge qaıtaryldy: «HAS» pıramıdasynyń qurbandary kimder?
Salymshylardyń aqshasyna Astana qalasynan avtoturaq oryndary bar eki páter satyp alynǵan, keıin sot bul jyljymaıtyn múlikke tutqyn saldy.
2021 jyldyń mamyr aıynda bul iske úshinshi qatysýshy qosylyp, áleýmettik jeliler arqyly salymshylardy belsendi túrde izdegen. Jyldam tabysqa úmittengen azamattar aqsha salyp, ol qarajat pıramıda jetekshileri men buryn tartylǵan qatysýshylar arasynda bólingen. Jalpy jınalǵan qarjy kólemi 136,5 mln teńgeni quraǵan.
Sonymen qatar osy qatysýshy Equitix kompanııasynyń qyzmetine de qatysyp, 2024 jyldyń maýsym aıynda bir azamatty aldap, ınvestısııa salýǵa kóndirip, onyń aqshasyn ıemdengen. Jábirlenýshi bank arqyly 30 mln teńge nesıe alyp, ony osy áıelge bergen.
Sot sheshimi boıynsha:
eki aıyptalýshy 6 jylǵa bas bostandyǵynan aıyryldy;
olardyń bireýiniń jazasyn óteýi 1 jylǵa keıinge qaldyryldy jáne onyń minez-qulqy baqylaýǵa alynady;
úshinshi qatysýshy 6 jyl 6 aıǵa sottaldy.
Sot sottalǵandardyń múlkin – páterlerdi, avtoturaq oryndaryn, kólikterdi, garajdy, jer telimin jáne uıaly telefondardy – tárkilep, ony jábirlenýshilerge materıaldyq shyǵyndy óteý úshin berdi.
Sonymen qatar memleket paıdasyna qylmystyq jolmen alynǵan 136,5 mln teńge tárkilendi.
6,8 mlrd teńge shyǵyn keltirgen: Abaı oblysynda qarjy pıramıdasy áshkere boldy
Sottalǵandardan jábirlenýshilerdiń azamattyq talaptary boıynsha 1,6 mln teńge kólemindegi ókildik shyǵyndar óndirildi. Budan bólek, bir sottalǵannan jábirlenýshiniń paıdasyna 30 mln teńge qosymsha óndirildi.
Sot úkimi ázirge zańdy kúshine engen joq.