Shymkentte ótken Eýrazııalyq úkimetaralyq keńestiń shaǵyn quramdaǵy otyrysynda ıntegrasııalyq yntymaqtastyqty jańa deńgeıge kóterý máselesi talqylandy. Taraptar saýda-ekonomıkalyq baılanysty keńeıtý, sıfrlyq tehnologııa men jasandy ıntellektini engizý arqyly ortaq naryqtyń tıimdiligin arttyrýǵa basymdyq berdi.
Otyrys Premer-mınıstr Oljas Bektenovtiń tóraǵalyǵymen ótti. Jıynǵa Belarýs Respýblıkasynyń Premer-mınıstri Aleksandr Týrchın, Qyrǵyz Respýblıkasy Mınıstrler kabınetiniń tóraǵasy – Prezıdent Ákimshiliginiń basshysy Adylbek Kasymalıev, Reseı Federasııasy Úkimetiniń tóraǵasy Mıhaıl Mıshýstın, Armenııa Respýblıkasynyń vıse-premeri Mger Grıgorıan, Eýrazııalyq ekonomıkalyq komıssııa alqasynyń tóraǵasy Baqytjan Saǵyntaev qatysty.
Kezdesý barysynda Eýrazııalyq ekonomıkalyq odaq (EAEO) aıasyndaǵy ózara is-qımyldy odan ári tereńdetý, saýda-ekonomıkalyq baılanystardy keńeıtý, sıfrlyq tehnologııalardy engizý men jasandy ıntellektini ıntegrasııalyq úderisterge tıimdi paıdalaný máseleleri talqylandy. Taraptar qazirgi geoekonomıkalyq jaǵdaıda birlesken jobalardy damytý men kedergisiz orta qalyptastyrýdyń mańyzdylyǵyna erekshe nazar aýdardy.
Elimiz bıyl Eýrazııalyq ekonomıkalyq odaq organdaryna tóraǵalyq etedi. Osyǵan baılanysty Memleket basshysy Qasym-Jomart Toqaev uıymǵa múshe memleketter basshylaryna joldaǵan úndeýinde tóraǵalyq kezeńiniń negizgi basymdyqtaryn aıqyndap bergen bolatyn. Atap aıtqanda, ekonomıkalyq ıntegrasııanyń jańa sapaly kezeńine ótý úshin jasandy ıntellekt múmkindikterin tıimdi paıdalaný, saýdadaǵy ákimshilik tosqaýyldardy azaıtý, sondaı-aq ózara jetkizý tizbekterin jetildirý mindetteri belgilendi.
Oljas Bektenov ıntegrasııalyq kún tártibin iske asyrýda ortaq kúsh-jigerdiń mańyzyna toqtalyp, EAEO keńistiginde ekonomıkalyq baılanystardy nyǵaıtý jańa múmkindikterge jol ashatynyn jetkizdi. Onyń aıtýynsha, sıfrlyq tehnologııalar men jasandy ıntellekt quraldaryn keńinen qoldaný óndiristik kooperasııany jandandyryp, óńirlik saýda kólemin ulǵaıtýǵa yqpal etedi.
Jıyn barysynda qatysýshylar sıfrlandyrýdyń ekonomıkanyń ártúrli salasyna tıgizer áserine de nazar aýdardy. Jasandy ıntellekt tehnologııalaryn engizý logıstıkalyq úderisterdi jedeldetip, taýar qozǵalysynyń ashyqtyǵyn arttyrýǵa, sondaı-aq tıimdi sıfrlyq jetkizý tizbekterin qalyptastyrýǵa múmkindik beretini aıtyldy. Bul óz kezeginde kásipkerlik belsendilikti arttyryp, jańa ınnovasııalyq jobalardyń iske asýyna jaǵdaı jasaıdy.
Buǵan qosa, taraptar ónerkásiptik kooperasııany keńeıtý, birlesken sıfrlyq platformalardy damytý, derekter almasý tetikterin jetildirý baǵytynda tájirıbe bólisti. Integrasııalyq birlestik aıasynda zamanaýı tehnologııalardy paıdalaný óndiris tıimdiligin arttyryp qana qoımaı, ekonomıkalardyń básekege qabilettiligin kúsheıtetini aıtyldy.
Otyrys «Indýstrııa 5.0: О́zara is-qımyl kúshi» taqyrybyna arnalǵan Digital Qazaqstan 2026 halyqaralyq sıfrlyq forýmy qarsańynda uıymdastyryldy. Bul óz kezeginde sıfrlyq transformasııa máseleleri boıynsha kópjaqty dıalogti tereńdetýge, jańa bastamalardy ilgeriletýge múmkindik beredi.
Jıyn qorytyndysynda qatysýshylar Eýrazııalyq ekonomıkalyq odaq keńistiginde ınnovasııalyq damý qarqynyn kúsheıtý, sıfrlyq sheshimderdi keńinen engizý jáne ekonomıkalyq áriptestikti jańa deńgeıge kóterý baǵytyndaǵy ózara is-qımyldy jalǵastyrýǵa nıetti ekenderin bildirdi.