Teatr – adamzat órkenıetiniń eń tereń tamyrynan nár alǵan, ýaqytpen birge jasaıtyn óner. Ol – qoǵamnyń aınasy ǵana emes, onyń jan dúnıesin terbeıtin, rýhyn jańǵyrtatyn qasıetti keńistik. 27 naýryz – Halyqaralyq teatr kúni – osy kıeli ónerge bas ıip, sahnaǵa ǵumyryn arnaǵan jandardyń eńbegin ulyqtaıtyn aıryqsha sát.
Bıyl bul merekeniń máni tipti tereń. О́ıtkeni 2026 jyl – qazaq kásibı teatrynyń 100 jyldyq mereıtoıymen tuspa-tus kelip otyr. Bir ǵasyrlyq tarıh – jaı ǵana ýaqyt ólshemi emes. 1926 jyly qazaqtyń tuńǵysh kásibı teatrynyń shymyldyǵy túrilgen sátten bastap, sahna ulttyq oıdyń minberine, rýhtyń tiregine aınaldy. Sodan bergi júz jylda qazaq teatry nebir syndarly kezeńdi bastan keshirdi. Ár dáýir óz únin, óz tynysyn sahna tilimen jetkizdi.
Sahnada ómir súretin akter – ýaqyttyń kýágeri ǵana emes, onyń jaratýshysy. Ol ár obraz arqyly adam taǵdyryn, qoǵam qaıshylyǵyn, ómirdiń mánin qaıtadan týdyrady. Rejısser – sol álemniń sáýletshisi. Al kórermen – osy uly shyǵarmashylyqtyń ajyramas bóligi. Teatr osy úsheýiniń toǵysqan tusynda ǵana tolyqqandy ónerge aınalady.
Ǵasyrlyq beleske jetken qazaq teatry búginde jańa izdenistermen, jańa formalarmen tolyǵyp keledi. Dástúr men jańashyldyq úılesim tapqan búgingi sahna – ótkenniń tájirıbesi men búginniń batyl qadamynyń toǵysy. Eksperımenttik baǵyttar, zamanaýı dramatýrgııa, rejısserlik tyń sheshimder – munyń bári teatrdyń toqtamaıtyn tirshilik ıesi ekenin dáleldeıdi. Al Halyqaralyq teatr kúni men qazaq kásibı teatrynyń 100 jyldyǵy – bir-birimen astasqan qos úlken mereke. Bul – ótkenge taǵzym, búginge baǵa, bolashaqqa baǵdar. Sebebi Halyqaralyq teatr kúni – mereke ǵana emes, bul – oılanatyn kún. Teatr bizge ne berdi? Biz teatrǵa ne bere aldyq? Qazirgi kórermen sahnadan ne izdeıdi? Osy suraqtar árbir óner adamynyń ǵana emes, árbir qoǵam múshesiniń aldynda turýy tıis. Sahna shamy sónbesin desek, rýh shyraǵyn óshirmeýimiz kerek. Teatrǵa barý – mádenıetke qurmet, ózińe degen jaýapkershilik. О́ıtkeni teatr – tek óner emes, ol – adam bolýdyń mektebi.