2 naýryzda bastalǵan Ulttyq biryńǵaı testileýden (UBT) búginge deıin 117 myńnan asa adam ótti. Talapkerlerdiń 71,6 %-y UBT-ny qazaq tilinde, 28,3%-y orys tilinde, 111 adam aǵylshyn tilinde tapsyrdy.
Keıingi aptanyń qorytyndysynda talapkerlerdiń 67,11 %-y shekti ball jınady. Bes pán boıynsha ortasha ball 63 baldy qurady. Eń joǵary nátıje – 139 ball. Erekshe bilim berý qajettiligi bar oqýǵa túsýshilerge qolaıly jaǵdaı jasaýdyń arqasynda UBT-ǵa 283 talapker qatysqanyn aıta ketken jón.
Talapkerlerdiń test tapsyrmalarynyń mazmuny boıynsha testileý aıaqtalǵannan keıin 30 mınýt ishinde apellıasııaǵa berý quqyǵy bar. Tehnıkalyq sebepter boıynsha apellıasııa tikeleı testileý kezinde qabyldanady. Nátıjeleri bar sertıfıkattar apellıasııa qarastyrylǵannan keıin jeke kabınetterde ornalastyrylady. UBT barysynda kalkýlıator, hımııalyq elementterdiń perıodtyq júıesi (Mendeleev kestesi), tuzdardyń erigishtik kestesi testileý baǵdarlamasynda qoljetimdi bolady. Atap ótsek, úmitkerler ótinish berý barysynda testileý kúnin, ýaqytyn, pýnktin ózderi tańdady.
UBT-ny ótkizýdiń úshinshi aptasynda 179 erejebuzýshylyq anyqtaldy. 97 talapker smartfon, shpargalka basqa da tyıym salynǵan zattardy alyp kirmek bolǵany úshin testileýden shettetildi. Taǵy 82 adam testileý kezinde ereje buzǵany úshin aýdıtorııadan shyǵaryldy, olardyń nátıjeleri joıyldy. О́zge adamdardyń ornyna kirý faktileri anyqtalǵan joq.
2026 jyly Ulttyq biryńǵaı testileýdiń formaty ózgerissiz qalady. Talapkerler úsh mindetti pándi jáne tańdaýy boıynsha eki beıindik pándi tapsyrady. UBT tapsyrmalarynyń jalpy sany – 120. Onyń ishinde «Qazaqstan tarıhy» páni boıynsha 20 tapsyrma, «Oqý saýattylyǵy» men «Matematıkalyq saýattylyq» pánderinen 10 tapsyrmadan, sondaı-aq eki beıindik pánniń árqaısysynan 40 tapsyrmadan beriledi. UBT boıynsha eń joǵary ball da ózgermeıdi, 140 baldy quraıdy. Testileý ýaqyty – 4 saǵat (240 mınýt). Bul rette erekshe bilim berý qajettiligi bar balalarǵa usynylatyn qosymsha 40 mınýt ýaqyt saqtalatynyn aıta ketý kerek. 2026 jylǵy UBT aıaqtalǵannan keıin kúntizbelik jyldyń 31 qazanyna deıin beınejazbalarǵa taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda UBT nátıjeleri joıylady.
Taǵy bir eskeretin jaıt, naýryzdaǵy UBT-ǵa shartty túrde aqyly negizde kúndizgi oqý nysany boıynsha joǵary oqý oryndaryna qabyldanǵandar, ótken jylǵy mektep túlekteri, kolledj túlekteri, qandastar, shetelde bilim alǵan el azamattary, mektep bitiretin túlekter joǵary oqý oryndaryna aqyly negizde túsý maqsatynda qatysady.