Qyzyljardyń «Sensitive» (sezimtal) bı teatry týraly talaı jazǵanbyz. Bul ujym qazir bı áleminde ózindik qoltańbasymen tanylyp, shetelderde moıyndalyp júr. Eýropa, Azııa elderiniń talaı baıqaýlaryna qatysyp, únemi júldeli oryndar alyp, birneshe bas júlde ıelendi.
Bul teatrdyń ereksheligi sonda, onyń bıshileri qulaǵy estimeıtin jandar. Osydan jıyrma jyldaı buryn boıynda uıymdastyrýshylyq qasıeti zor ekenin sezingen óner kolledji bı bóliminiń stýdenti Olga Rostovshıkova qaladaǵy qulaǵy estimeıtin balalar tárbıelenetin mektep-ınternatqa baryp, bıge yńǵaıy bar balalardan ansambl qurǵan. Sodan beri ansambldiń jumysy jalǵasyp keledi. Trýppaǵa jańa úmitkerler de sol ınternattaǵy bı úıirmesine qatysatyn jastarmen tolyqtyrylady. «Qulaǵy estimeıtin jandarmen jumys isteý ońaı bolǵan joq. Men aldymen ymmen sóılesýdiń tásilin de bilmeı, qaǵazǵa jazyp aıtatynmyn. Biraq bulardyń ónerge qushtar ekenin, boılaryndaǵy bımen baılanysty bula kúshterin syrtqa shyǵarýǵa umtylatyndaryn kórip, qansha qıyn bolsa da tastap ketpedim», dep eske alǵan edi Olga Pavelqyzy óziniń bir esteliginde.
Sensitive-tiń alǵashqy toby mektep jasynan asyp, endi olardyń trýppasyn qaıda jiberemiz, kimge qosamyz, bólek teatr salýǵa qarajat joq degen másele tuıyqqa tiregende S.Muqanov atyndaǵy Qazaq sazdy-dramalyq teatry óziniń qanatynyń astyna alǵan. Teatrdyń dırektory, Qazaqstannyń eńbek sińirgen qaıratkeri Birjan Jalǵasbaev trýppanyń óte eńbekqor ekenin aıtty. «Tańǵy saǵat toǵyzdan kelgen olar túngi 10-11-lerge deıin repetısııa jasaıdy. Tańǵalamyz», dedi ol. Áýeli daryn, sosyn eńbekqorlyq qosylǵan soń alynbaıtyn qamal joq ekeni belgili, joǵaryda aıtylǵan tabystyń qaınar kózi sonda bolyp tur.
Al endi «Botaı» etnoplastıkalyq perfomansyna keleıik. Perfomans (performance) aǵylshyn tilinen aýdarǵanda oryndaý, oınaý degen sóz. Teatrlyq kórkem qoıylymnyń bir janry. Al bıdegi etnoplastıka degenimiz etnostyń sıpatyn ashýǵa umtylyp, ónerdiń plastıkamen oryndalýy.
Sózine qaraǵanda, Olga Rostovshıkova birde Parıjdiń álemdik kórmesinde bolyp, onda Qazaqstandy jylqymen ushtastyryp, assosıasııa jasaǵan kompozısııa kórgenin aıtady. Al astynda adamzattyń jylqyny alǵash qolǵa úıretýi Qazaqstannyń «Botaı» degen mekeninde bastalǵan dep jazylǵan eken. «Onyń ústine «Botaı» Qazaqstannyń soltústiginde degen anyqtama berilipti. Týǵan jerim atalǵan bul sózder maǵan toq urǵandaı áser etip, «Botaı» týraly qoıylym jasaýym kerek degen oı janyma maza bermedi. Sodan dramatýrg Qolǵanat Murattyń shyǵarmasyn qolǵa alyp, ony sahnalaýǵa respýblıkalyq koreı teatrynyń rejısser-horeografy Anna Soıdy shaqyryp, teatrdyń dırektory Birjan Jalǵasbaevtyń qoldaýymen aınalasy bir aıdyń ishinde qoıylymdy sahnaǵa shyǵaryp otyrmyz», dedi ol perfomanstyń aldynda jýrnalısterge bergen brıfıngte.
Osydan 5 jarym myń jyl burynǵy adamdar ómiri, olardyń ózara talas-tartysy, jaýlarymen aıqasy, tabıǵattyń dúleı kúshimen alysýy plastıkalyq bımen kórkem beınelendi. «Qadamym ónbeıdi, jyldam júre almaımyn, ańǵa jete almaımyn» degen muńly kúńirený de kúıki tirliktiń qutyn qashyryp turady. Jalǵyz-aq ómirden úmit úzbeı eńbek qylýǵa aqyl bergen Umaı ananyń aqyly da taıpa turǵyndaryn biraz serpiltken bolady. Osyndaıda úıirinen adasyp, qasqyr talaǵan býaz bıe adamdar arasyna kelip qulyndaıdy da óledi. Dál osy kúni taıpadaǵy bir kelinshek dúnıege ul bala ákeledi. Sóıtip, eki qulyn birge ósip, adamnyń jylqyny alǵash ret analyq mahabbatpen qolǵa úıretkeni bımen aıtylady. Árıne, Kún men Jer beınesindegi kıeli álemniń de áseri, fantazııa men qııal da oqıǵany birde shıelenistirip, birde jaımashýaqqa tartyp, kórkemdep otyrady. Aqyrynda «Botaı eli erledi, asaý minip terledi» degen saryn shyǵyp, qasyndaǵy qolǵanaty, ishse qymyzy, jese qazysy, jaýǵa minse pyraǵy, alysqa aparatyn qanaty bolǵan qasıetti jylqy men adamnyń dostyǵy áıgilenip, perfomans tamasha sheshimmen aqtaldy.
Qoıylym bir jarym saǵattaı ýaqytqa sozylǵanymen qyzyq bolǵan soń tez aıaqtalǵandaı áser qaldyrdy. Bıdiń únin, aıtpaq bolǵanyn tolyq túsinbese de oryndaý sheberlikterine súısingen kórermender ónerpazdarǵa shynaıy alǵystaryn jetkizdi.
Dál osy kúni Halyqaralyq teatr kúni atalyp ótken edi, soǵan baılanysty «Altyn saqa» dep jarııalanǵan teatrishilik baıqaýdyń túrli atalymdary boıynsha jeńimpaz bolǵan ártisterge qurmet qaǵazdary men baǵaly syılyqtar tabys etildi.
PETROPAVL