Batys Qazaqstan oblysynda «Bilim berýdi aqparattandyrý jáne jobalaý ortalyǵy» ashylyp, óńirdegi bilim júıesin sıfrlandyrý men ınnovasııalyq damytý baǵytynda júıeli jumys bastaldy.
Bul ortalyqtyń qyzmeti negizgi tórt salaǵa baǵyttalyp, zaman talabyna saı naqty jobalar júzege asyp jatyr.
«Bizdiń ortalyq ınfraqurylymdy damytyp qana qoımaı, bilim salasyna startap formatyndaǵy jańa bastamalardy engizýimen erekshelenip keledi. Bul jobalar bilim berýdiń tıimdiligin arttyryp qana qoımaı, óńirde sıfrlyq mádenıetti qalyptastyrýǵa yqpal etedi. Biz jańashyl bastamalar arqyly Batys Qazaqstan oblysyndaǵy bilim júıesin jańa deńgeıge kóterýdi maqsat etip otyrmyz», deıdi ortalyq dırektory Aqan Bıjanov.
Ortalyq qolǵa alǵan birinshi baǵyt – bilim salasyn sıfrlandyrý jáne IT-ınfraqurylymdy damytý. Bul baǵyt aıasynda «Smart School ZKO» startap jobasy iske asyryla bastady. Joba mektepterdiń sıfrlyq ekojúıesin qalyptastyrýǵa baǵyttalǵan. Iаǵnı elektrondyq jýrnal, sıfrlyq kitaphana, beınebaqylaý jáne mektepishilik basqarý júıeleri bir platformaǵa biriktiriledi. Sonymen qatar «IT Support 24/7» jobasy arqyly bilim uıymdaryna táýlik boıy tehnıkalyq qoldaý kórsetetin júıe iske qosylady.
Ekinshi baǵyt – bilim monıtorıngileý jáne taldaý. Ortalyq bul baǵytta «Bilim Analytics» startap jobasyn júzege asyrýǵa kirisken. Bul joba bilim uıymdarynyń kórsetkishterin avtomatty túrde jınaqtap, taldaýǵa múmkindik beredi. Júıe arqyly mektepterdiń reıtıngi, bilim sapasy, qatysý deńgeıi sekildi negizgi ındıkatorlar naqty ýaqyt rejiminde kórinip turady. Bul basqarý sheshimderin jedel qabyldaýǵa jaǵdaı jasaıdy.
Ortalyqtyń úshinshi baǵyty – medıa jáne aqparattyq súıemeldeý. Bul boıynsha «EduMedia Hub» startap jobasy iske qosylǵan. Joba aıasynda muǵalimder men oqýshylarǵa arnalǵan sapaly sıfrlyq kontent (beınesabaqtar, podkasttar, áleýmettik rolıkter) ázirlenedi. Sonymen qatar «Digital Teacher» bastamasy arqyly pedagogterdiń jeke brendin damytýǵa, áleýmettik jelilerde kásibı kontent júrgizýge qoldaý kórsetiledi.
Al sońǵy, tórtinshi baǵyt – jobalaý jáne ınnovasııalyq bastamalarǵa arnalǵan. Bul baǵytta «AI Mektep» qanatqaqty startap jobasy júzege asyrylyp jatyr. Joba jasandy ıntellekt elementterin oqý úderisine engizýdi kózdeıdi. Atap aıtqanda, oqýshynyń bilim deńgeıin taldaıtyn adaptıvti júıeler, avtomatty tekserý platformalary jáne sıfrlyq assıstentter engiziledi. Sonymen qatar «Startup School ZKO» jobasy arqyly oqýshylardyń kásipkerlik jáne startap mádenıetin damytýǵa erekshe kóńil bólinedi.
Mine, Memleket basshysy Qasym-Jomart Toqaev jarııalaǵan Sıfrlandyrý jáne jasandy ıntellekt jylynda Aqjaıyq óńirinde osyndaı júıeli jumys qolǵa alyndy. Aqan Málikulynyń aıtýynsha, bul ıgi bastamalardyń jemisi kóp keshikpeı kórine bastaýǵa tıis.
Batys Qazaqstan oblysy