Zańsyz shyǵarylǵan aktıvterdi qaıtarý tek qarjylyq kórsetkish emes, onyń artynda naqty áleýmettik mańyzy bar jobalar men adamdardyń taǵdyry jatyr. Bul – áleýmettik ádilettilikti qalpyna keltirýdiń mańyzdy tetigi. Sonyń aıqyn dáleli retinde Shymkent qalasynda erekshe bilim berý qajettilikteri bar balalarǵa arnalǵan jańa jataqhana paıdalanýǵa berildi. Bul týraly Bas prokýror Berik Asylov áleýmettik jelidegi paraqshasynda jazdy, dep habarlaıdy Egemen.kz.
Buǵan deıin mektep-ınternat tárbıelenýshileriniń jaǵdaıy kúrdeli bolǵan. 1975 jyly salynǵan eski ǵımaratta oryn tapshylyǵy bolyp, 125 orynǵa eseptelgen nysanda 290 bala turǵan. Infraqurylymnyń tozýy balalardyń ómir súrý sapasyna da áser etken.
«Jańa jataqhana bul máselelerdi tolyq sheshýge baǵyttalǵan. Jalpy aýdany 8288,70 sharshy metrdi quraıtyn nysan 300 orynǵa arnalǵan jáne zamanaýı standarttarǵa saı salynǵan. 3,5 gektar aýmaqta balalardyń bos ýaqytyn tıimdi ótkizýi úshin fýtbol alańy, vorkaýt aımaǵy, oıyn jáne demalys alańdary qarastyrylǵan», delingen jazbada.
SQO-daǵy aýylǵa qaıtarylǵan qarjy esebinen aýyz sý qubyry tartyldy
Ǵımarat ishinde uldar men qyzdarǵa arnalǵan bólek turǵyn bloktar, zamanaýı medısınalyq kabınet, keń oıyn bólmeleri jáne balalardyń damýyna qolaıly basqa da fýnksıonaldyq keńistikter bar. Bul tárbıelenýshiler úshin qaýipsiz ári jaıly orta qalyptastyrýǵa múmkindik beredi.
Jobany júzege asyrý úshin Memleket basshysynyń tapsyrmasymen qaıtarylǵan aktıvter men olardy satýdan túsken qarajat jınaqtalǵan Arnaýly memlekettik qordan 2,6 mlrd teńge bólindi.
Bas prokýratýranyń málimetinshe, bul baǵyttaǵy jumys júıeli túrde jalǵasyp jatyr. Qaıtarylǵan qarajat esebinen el boıynsha shamamen 500 mlrd teńgege 440 áleýmettik jáne kommýnaldyq nysannyń qurylysy qarjylandyryldy. Olardyń 319-y qazirdiń ózinde paıdalanýǵa berilgen. Bul qatarda mektepter, aýrýhanalar jáne sýmen jabdyqtaý júıeleri bar.
Qaıtarylǵan qarjy aýrýhana qurylysyna jumsaldy
Jaýapty organdardyń aıtýynsha, qaıtarylǵan árbir teńge halyqtyń ıgiligine jumsalýy tıis. Bul qarajat áleýmettik mańyzy bar jobalardy júzege asyrýǵa, azamattardyń ómir súrý sapasyn arttyrýǵa jáne óńirlerdi damytýǵa baǵyttalyp otyr.