Taýlary men qyrattary joqqa tán jazyq dalada ornalasqan Atyraý oblysy jel men kúnnen qýat jınaýǵa taptyrmaıtyn óńir. Qazirdiń ózinde Atyraý oblysynda jelden energııa óndiretin qondyrǵylardy paıdalanyp otyrǵandar bar. Endi Jylyoı aýdanynyń aýmaǵynan kún sáýlesinen qýat óndiretin arnaıy stansa salý isi qolǵa alynyp otyr. Qazirdiń ózinde bul jobany iske asyrý úshin arnaıy jer telimi berildi. Elimizde alǵash ret iske asyrylatyn joba boıynsha 10 MVt elektr energııasyn óndirý josparlanǵan. Jobaǵa shetel ınvestısııasy salynbaq. Ony iske asyratyn merdigerlikke «Ekoproekt-Qulsary» seriktestigi tańdalyp otyr.
Qulsary qalasynda turatyn kásipker Asqar Sekerbaevtyń balamaly energııa óndiretin stansasynyń ınnovasııalyq jobasy tıisti memleket tarapynan qoldaý taýypty. Onyń aıtýynsha, kún sáýlesinen jınalatyn elektr qýatyn ótkizý máselesi sheshilip tur. Atyraý dalasynda óndirilgen balamaly elektr energııasyn «KEGOC» AQ satyp alyp, 15 jyl boıy ortaq jelige qosady. Bir KVt energııa quny –37 teńge. Stansada jınaqtalǵan energııamen 1000 turǵyn úıdi qamtýǵa bolady. – Kún sáýlesinen energııa óndirýdiń esh qıyndyǵy joq. О́te qarapaıym tásilmen, ıaǵnı, fotoelektrlik modýldar arqyly kún sáýlesi elektr qýatyna aınaldyrylady. Energııa akkýmýlıatorlarǵa jınalyp, kabelmen ortaq jelige qosylady, – deıdi joba ıdeıasynyń ıesi Asqar Sekerbaev. Degenmen, onyń pikirinshe, bul salada mamandar óte tapshy, sonymen birge, basqarýshylar da jetispeıdi eken. Bul tyǵyryqtan shyǵý joly bar ma? Úkimet atalǵan salada mamandar daıarlaýdyń josparyn Germanııanyń Ekonomıka jáne energetıka federaldy mınıstrligimen, sondaı-aq, «Turan-Profı» akademııasymen birigip jasaqtapty. Osyndaı mámile aıasynda balamaly energııa óndirýshi kásiporyndardyń jetekshilerin Germanııada taǵylymdamadan ótýge jiberipti. Endi jaqynda olar Germanııadaǵy Kıl qalasynda taǵy bir ret taǵylymdamadan ótedi. Shyndyǵynda, bul erekshe joba bolǵaly tur. Ony usynǵan Asqar Sekerbaev qurylys jumysyn áne-mine bastamaq. Qurylys jumystaryna 150 adam tartýdy kózdepti. Kún sáýlesin elektr energııasyna aınaldyratyn stansany iske qosý aldaǵy jyldyń mamyr aıyna josparlanyp otyr.
Joldasbek ShО́PEǴUL, «Egemen Qazaqstan».
Atyraý oblysy, Jylyoı aýdany.