Aqtaýdaǵy «Aqtaý teńiz porty» arnaıy ekonomıkalyq aımaǵy – jańa kásiptik nysandardy ashýǵa qolaıly oryn. Keıingi jyldary atalǵan aımaqtan óz kásibin kórgisi, órkendetkisi keletinder sany kóbeıip keledi. Úkimet qaýlysyna sáıkes bıyl «Aqtaý teńiz porty» AEA aýmaǵynyń 10 myń gektarǵa deıin ulǵaıtylýy da suranys pen qyzyǵýshylyqtyń bar ekeniniń dáleli.
Jaqynda ekonomıkalyq aımaqtan jaǵymdy jańalyq jetti, munda sý tazartý súzgilerin shyǵaratyn jańa óndiris orny ashyldy. Joba ımportty almastyrýdy, otandyq ónim úlesin arttyrýdy maqsat etken. Kúndelikti tutynatyn sýdy súzip ishý – aqtaýlyqtar úshin ózekti másele. Sondyqtan mundaı kásiporynnyń iske qosylýy óńirdegi mańyzdy bastamalardyń biri boldy.
«Akva Fılter» JShS júzege asyratyn óndiristiń jyldyq qýaty 160 myń súzgish elementti quraıdy. Jobanyń quny – 100 mln teńge, al josparlanǵan jyldyq óndiris kólemi 617,5 mln teńgege jetedi. Qazir kásiporynda 15-ten astam jergilikti turǵyn turaqty jumyspen qamtylǵan.
О́ndiriste paıdalanylatyn negizgi shıkizat ta – otandyq ónim. Polımerlik granýlalar Atyraýdan jetkizilip, Aqtaýda óńdeledi. О́ndiris ornynyń ónimi – súzgish elementter turmysta, medısınada jáne munaı-gaz salasynda qoldanylady.
– Memleket basshysy Qasym-Jomart Toqaevtyń otandyq óndirýshilerdi qoldaý men ınvestorlarǵa qolaıly jaǵdaı jasaý baǵytyndaǵy saıasatynyń nátıjesin sezinip otyrmyz. Arnaıy ekonomıkalyq aımaqta kásiporyndarǵa birqatar salyqtyq jeńildik qarastyrylǵan. Búginde bizdiń kásiporyn – óńirdegi sý súzgish elementterin shyǵaratyn jalǵyz óndiris orny. Qýatymyz táýligine 4 myńnan astam ónim shyǵarýǵa jetedi, – deıdi «Akva Fılter» JShS basshysy Amangeldi Tasqymbaev.
Onyń aıtýynsha, arnaıy ekonomıkalyq aımaqta kásiporyndarǵa qolaıly jaǵdaı jasalǵan. Arnaıy ekonomıkalyq aımaq óz kókjıegin keńeıte túspek, ıaǵnı aldaǵy ýaqytta óndiris kólemin ulǵaıtý josparlanyp otyr.
«Aqtaý teńiz porty» AEA» AQ atqarýshy dırektory Gúlmıra Ábishevanyń aıtýynsha, aımaqta basym qyzmet túrleri keńeıtilgen.
– Endi óńdeý ónerkásibimen qatar týrızm, aýyl jáne balyq sharýashylyǵy, ózge de baǵyttarda jańa jobalardy júzege asyrýǵa múmkindik bar. Bıyl jalpy quny 158,6 mlrd teńgeni quraıtyn 16 ınvestısııalyq joba iske qosylady, – dedi G.Ábisheva.
Onyń aıtýynsha, bul 16 ınvestısııalyq joba iske qosylǵanda 1800-ge jýyq jańa jumys orny ashylady eken. Qazir ónerkásip, logıstıka, týrızm men ınfraqurylym baǵyttaryndaǵy nysandarda qurylys-montaj jumysy júrgizilip, qajetti óndiristik jabdyqtar kezeń-kezeńimen jetkizilip jatyr. Jalpy, «Aqtaý teńiz porty» AEA» AQ aýmaǵynda júzege asqan árbir irili-usaqty jańa óndiris oryndary – el ekonomıkasyna qosylǵan úles bolmaq.
Mańǵystaý oblysy