Aqyn, memleket jáne qoǵam qaıratkeri Oljas Súleımenov aqyn, Qazaqstannyń Eńbek Eri Muhtar Shahanovtyń dúnıeden ótýine baılanysty kóńil aıtý hatyn joldady. Aqynnyń hatyn tómende tolyq usynyp otyrmyz, dep habarlaıdy Egemen.kz.
Kórnekti aqyn, qoǵam qaıratkeri, Qazaqstannyń Eńbek Eri, ult rýhanııatynyń iri tulǵasy Muhtar Shahanov dúnıeden ótti. Biz úshin orny tolmas aýyr qaza.
Muhtar Shahanov – tek poezııa áleminde ǵana emes, ult taǵdyryna qatysty eń kúrdeli máselelerde de qaısar únin joǵaltpaǵan tulǵa edi. Ol el taǵdyry synǵa túsken kezeńderde árdaıym aldyńǵy shepten tabylyp, eldik múdde jolynda tabandy kúres júrgizdi. Ásirese Jeltoqsan oqıǵasy aqıqatyn ashýdaǵy qaısarlyǵy men ádilet jolyndaǵy batyl úni halyq jadynda máńgi saqtalady. Onyń Aral qasireti jónindegi janaıqaıy – adamzat aldyndaǵy úlken jaýapkershiliktiń kórinisi.
Aqyn amanaty oryndaldy: Muhtar Shahanov týǵan jeriniń topyraǵyna jerlendi
1991 jylǵy 5 qazanda qurylǵan Qazaqstannyń halyq kongresi partııasy – el taǵdyryna beıjaı qaramaıtyn, lıberaldy-demokratııalyq baǵytty ustanǵan saıası kúsh boldy. Bul qozǵalys kezdeısoq paıda bolǵan joq, ol halyqtyń shynaıy únine aınalý úshin dúnıege keldi. Sol tusta Muhtar Shahanov ekeýmizdiń osy partııaǵa tóraǵalyq etýimiz – úlken jaýapkershilik edi. Osy turǵydan alǵanda, Shahanov – naǵyz saıasatker. Onyń árbir sózi halyqtyń muńymen úndesip, júreginen shyqqan shynaıy oı retinde qabyldandy.
Memleket basshysy Muhtar Shahanovtyń otbasyna kóńil aıtý jedelhatyn joldady
Men «Nevada-Semeı» qozǵalysy arqyly ıadrolyq synaq polıgonyn jabýǵa ún kótersem, Muhtar Shahanov Aral tragedııasyn toqtatýǵa shaqyryp, tabıǵat pen adamzat taǵdyrynyń birtutastyǵyn dáleldedi. Marqumnyń otbasy men týǵan-týystaryna, barsha qazaqstandyqtarǵa qaıǵyryp kóńil aıtamyn.
Oljas SÚLEIMENOV,
Aqyn, Qazaqstannyń Eńbek Eri,memleket jáne qoǵam qaıratkeri