Eýrazııalyq ekonomıkalyq odaqqa (EAEO) múshe elder arasynda Qazaqstan ónerkásip óndirisiniń ósimi boıynsha aldyńǵy qatardan kórindi. Eýrazııalyq ekonomıkalyq komıssııa (EEK) jarııalaǵan málimetke sáıkes, 2025 jyldyń qańtar-jeltoqsan aılarynda elimizdegi ónerkásip óndirisiniń kólemi 2024 jyldyń osy kezeńimen salystyrǵanda 7,5%-ǵa artqan, dep habarlaıdy Egemen.kz.
EEK deregine súıensek, 2025 jyly EAEO elderindegi ónerkásip óndirisiniń jalpy kólemi ótken jyldyń deńgeıimen salystyrǵanda 101,6% bolǵan. Osylaısha, Qazaqstan odaq elderi arasyndaǵy eń joǵary ósim kórsetken memleketterdiń biri atandy. Kósh basynda ónerkásip óndirisi 10,6%-ǵa ósken Qyrǵyzstan tur.
Jyl qorytyndysy boıynsha Armenııada ónerkásip óndirisi 4,7%-ǵa, Reseıde 1,3%-ǵa ósken. Al EAEO keńistiginde óndiris kólemi tómendegen jalǵyz el – Belarýs. Ondaǵy kórsetkish 1,8%-ǵa azaıǵan.
EAEO elderiniń 100 myńnan astam azamatyna zeınetaqy jarnasy tólendi
Komıssııa 2025 jyldyń jeltoqsan aıyndaǵy kórsetkishterdi de usyndy. Qazaqstanda ónerkásip óndirisi 2024 jyldyń jeltoqsanymen salystyrǵanda 8,1%-ǵa artqan. Al 2025 jyldyń qarashasymen salystyrǵanda ósim 10,4% bolǵan.
Jalpy EAEO boıynsha jeltoqsandaǵy ónerkásip óndirisi bir jyl ishinde 3,9%-ǵa ulǵaıǵan. Bul kezeńde eń joǵary ósim Armenııada tirkelip, kórsetkish birden 38,6%-ǵa jetken. Qyrǵyzstanda ósim 10,4%, Qazaqstanda 8,1%, Reseıde 3,7% bolǵan. Belarýsta, kerisinshe, óndiris kólemi 2,9%-ǵa tómendegen.
Esepte 2024 jyly EAEO elderindegi ónerkásip óndirisi 2023 jylmen salystyrǵanda jalpy 5%-ǵa óskeni aıtylǵan. Sol jyly Qazaqstanda da oń dınamıka saqtalyp, ósim 2,8% bolǵan.
EEK jarııalaǵan statıstıkalyq málimetterdiń aldyn ala ekeni jáne keıin naqtylanýy múmkin ekeni atap ótildi. Sondaı-aq komıssııa Reseıdiń 2024-2025 jyldarǵa arnalǵan ónerkásip óndirisi statıstıkasyn naqtylaýyna baılanysty EAEO boıynsha derekterdiń qaıta eseptelgenin habarlady.
Oljas Bektenov EAEO aýmaǵynda júk tasymalyn retteıtin JI platformasyn qurýdy usyndy