«Jedel járdem» ardagerlerdiń qolynda

Bıyl Táýelsiz Memleketter Dostastyǵy aýmaǵynda Arda­gerler jyly bolyp jarııalandy. Osyǵan oraı elimizde Respýblıkalyq ardagerler keńesi men «Samuryq-Qazyna» ulttyq ál-aýqat qory arasynda qurylǵan ózara yntymaqtastyq memorandýmyna sáıkes, «О́mir jelisi» aksııasyn júzege asyrý qolǵa alyndy. Aksııanyń basty maqsaty – Uly Otan soǵysyna qatysýshylardy «dabyl núktesi» bar uıaly telefonmen qamtamasyz etý. Osyǵan oraı oblystyq «Arda­gerler úıinde» Uly Otan soǵy­syna qatysqan maıdangerler­men kezdesý ótti. Aldymen sóz alǵan «Eýrazııalyq Medıa-forým» ha­lyqaralyq qorynyń ókili Olga Saveleva jeńisti jaqyn­dat­qan qart jaýyngerlerdi aldaǵy kele jatqan mereıli merekelerimen quttyqtap, «sizder barlyq qur­metke laıyqsyzdar, aman boly­ńyzdar» dep tilek tiledi. «О́mir joly» qoǵamdyq qory­nyń dırektory Ernar Nurbekov uıaly telefonǵa uqsaıtyn «dabyl núktesi» bar apparattyń mán-jaıyn túsindirdi. Búginde maıdangerler qatary sıregen, kópshiligi syrqat. Telefonnyń bir jaqsysy – ony qulaǵy aýyr estıtin, kózi kórmeı qalǵan qart­tar erkin paıdalana beredi. «Dabyl núktesin» bassa, operator shuǵyl kómek brıgadasyn attandyrady. Bazada búginde jer basyp júrgen 5083 qart jaýyngerdiń jaǵdaıy túzilgen karta bar, barlyq jaıttar eskerilgen. Oblystyq ardagerler keńe­siniń tóraǵasy Jeńis­bek Máý­lenqulov: «Biz Respýb­lıkalyq ardagerler keńesine málimet bergende oblysta 473 maıdanger bar edi, qazir 449-y ǵana aman-saý júr», dedi. Árıne, ókinishti. Ekinshi dúnıejúzilik soǵysty búginde ózinshe kesip-piship árqıly pikir aıtyp júrgender bar. «Otan úshin otqa tús, kúımeısiń» dep er Baýkeń aıtqandaı, qandy qasapqa túsken bul ardagerlerdiń erligi urpaqqa úlgi. Ernar Nurbekov aıtqandaı, «dabyl núktesi» buǵan deıin Almaty, Astana, Qaraǵandy qalalarynda qoldanylypty. 400 ardagerge kómek kórsetilip, 3 maıdangerdi ajal aýzynan aman alyp qalǵan. Respýblıkalyq kómek ortalyǵy «QazTelekom» bazasynda jumys jasaıdy. Buǵan qosymsha, «Bılaın» baılanys operatory arnaıy tarıf júktelgen nómirlermen qamtamasyz etipti. Aksııada UOS ardageri Aıtjan Beknazarov sóz alyp: «Mynaý jaqsy eken. Qyzmeti kerek bolsa, dabyl túımesin basasyń. Bizdiń densaýlyǵymyzdy qadaǵalap otyrǵan Elbasymyzǵa, Úkimetke rahmet», dedi. Baqtııar TAIJAN, «Egemen Qazaqstan». ShYMKENT.