Áleýmettik jelilerde Astana qalasyndaǵy qoǵamdyq tamaqtaný oryndarynda ıt eti satylǵany týraly aqparat tarap jatyr. Atalǵan jaıtqa qatysty «Astana vetservıs» KMK málimdeme jasady, dep jazady Egemen.kz.
Veterınarııalyq-sanıtarııalyq baqylaý qyzmetimen aınalysatyn mekeme dereginshe, málimetter 2023 jyly Aqmola oblysynda bolǵan. Atalǵan fakti boıynsha is sotta qaralyp, kináli azamat jaýapkershilikke tartylǵan.
«Qazirgi ýaqytta Astana qalasyndaǵy qoǵamdyq tamaqtaný oryndarynda mundaı ónimdi jetkizý, satý nemese paıdalaný faktileri resmı túrde rastalǵan joq», delingen habarlamada.
Mekeme mamandary jaǵdaı ýákiletti organdardyń turaqty baqylaýynda ekendigin atap ótip, sanıtarııalyq-veterınarııalyq talaptardyń saqtalýyna júıeli túrde monıtorıng pen tekserý júrgizilip otyrǵandyǵyn jetkizdi.
Eske sala keteıik, buǵan deıin ekologtar men janýarlardy qorǵaýshylar «Chestno Govorıa» podkastynda Astanadaǵy tanymal meıramhanalardyń biri taǵamdardaǵy tartylǵan farsh quramyna ıt etin qosyp satqandyǵyn aıtqan edi.