Qurmanǵazy atyndaǵy Qazaq ulttyq halyq aspaptar orkestriniń repertýaryndaǵy tańdaýly shyǵarmalar álemniń jetekshi mýzykalyq platformalarynda jarııalanyp, qazaqtyń kúı óneri jahandyq aýdıtorııaǵa jol tartty.
Orkestr tarıhynda tuńǵysh ret júzege asqan bul joba qazaqtyń ǵasyrlar tereńinen jetken kúı murasyn jańa tehnologııa múmkindikterimen ushtastyryp, ulttyq mýzykany álemdik mádenı aınalymǵa shyǵarýǵa jol ashyp otyr. Endi dombyranyń qońyr úni men halyqtyq mýzyka dástúriniń baı murasy jer júzindegi tyńdarmandarǵa qoljetimdi boldy.
Jańa platformada qazaqtyń kúı ónerin qalyptastyrǵan uly tulǵalardyń shyǵarmalary toptastyryldy. Olardyń qatarynda Qurmanǵazy Saǵyrbaıuly, Dına Nurpeıisova, Táttimbet, Qazanǵap, Nurǵısa Tilendıev syndy dástúrli mekteptiń kórnekti ókilderi bar. Sonymen birge Ahmet Jubanov, Evgenıı Brýsılovskıı, Kenjebek Kúmisbekov, Shamǵon Qajyǵalıev, Hamza Tastanov, Seıdolla Báıterekov, Sergeı Shabelskıı, Leonıd Shargorodskıı, Serik Qusaıynov sekildi kompozıtorlardyń shyǵarmalary da tyńdarman nazaryna usynyldy.
Kúı óneri – halyqtyń tarıhı jady men rýhanı dúnıetanymyn saqtaǵan erekshe mádenı qubylys. Endigi jerde osy mura sıfrlyq ortada jańa tynys alyp, álemdik mýzykalyq keńistikpen úndese bastady. Atalǵan bastama ulttyq ónerdi zamanaýı formatta tanytyp qana qoımaı, onyń kórkemdik qundylyǵyn jańa býyn tyńdarmanyna jaqyndatýǵa jol ashty.