Álem chempıonatynyń kezekti saıys kúni tartysqa toly boldy. Tarıh jylnamasyna jańa derek qattalyp, álem chempıonatynyń statıstıkasy súbeli málimettermen molyqty.
«K» tobynda alǵashqy matchyn ótkizgen Portýgalııa men Kongo Demokratııalyq Respýblıkasynyń quramalary teń tarqasyp, bir upaıdan enshiledi. Oıynnyń 6-mınýtynda jartylaı qorǵaýshy Joaý Nevesh esep ashyp, Portýgalııa quramasyn alǵa shyǵardy. Birinshi taımnyń negizgi ýaqytyna qosylǵan 5 mınýttyń ishinde Kongo quramasynyń shabýylshysy Ioan Vıssa tarazy basyn teńestirip, óz eliniń tarıhynda álem chempıonatynda gol soqqan alǵashqy oıynshy atandy. Jahandyq mýndıalǵa 1974 jyldan keıin ekinshi márte at izin salǵan afrıkalyq qurama osylaı azýyn kórsetip, tuńǵysh ret upaı oljalady.
AQSh-tyń Hıýston qalasyndaǵy «En-Er-Djı Stedıým» stadıonynda ótken oıynda álemniń tańdaýly fýtbolshysy Krıshtıaný Ronaldý jarqyrap kórine almady. 41 jastan tórt aı asqan sańlaq altynshy ret álem chempıonatyna qatysyp otyr. Ronaldý match barysynda onyń shaý tartyp, shaldyǵa bastaǵany anyq baıqaldy. Alańda bar-joǵy da asa bilinbedi. Ortekedeı oıqastaǵanda túlep sala beretin surmergen sarqyla bastaǵandaı áser qaldyrdy. Tipti áriptesteri aldyna ákep, aıaǵyna salyp bergen dopty qaqpaǵa dál baǵyttaı almaı, pushaıman kúıge tústi. Ronaldý alańda 90 mınýt boıy tóbe kórsetip júrgeni bolmasa baýyryn jaza, qoltyǵyn sóge kósile almady.
«K» tobyndaǵy ekinshi match Meksıkada ótti. Mehıkonyń áıgili «Asteka» stadıonynda О́zbekstan men Kolýmbııa quramalary sheberlik baıqasty. Álem chempıonatyna tuńǵysh ret at baılaǵan ózbek aǵaıynnyń ulttyq quramasy jahan dodasyn jatyrqaǵan joq. Jasyl alańda jasyn oınatyp, qarsylastyń qysymyna toıtarys bere jiger tanytty. Qorǵanys shebiniń myqtylyǵy sonshalyq, kolýmbııalyq fýtbolshylardy tyrp etkizgen joq. Olaı deıtinimiz kolýmbııalyq shabýylshylar О́tkir Júsipov qorǵaǵan О́zbekstan ulttyq quramasynyń qaqpasyna alǵashqy týra soqqyny tek 17-mınýtta ǵana baǵyttaı aldy. Anglııanyń «Manchester Sıtı» komandasynda oınaıtyn talantty Abdýqadyr Hýsanov bastaǵan tasqamal qorǵanysty buza alǵan joq. Degenmen de múmkindikti múlt jibermeıtin Kolýmbııa quramasy dittegenine jetti. Matchtyń 40-mınýtynda Mýnos esep ashyp, kolýmbııalyqtar alǵa ozǵan. Ekinshi taımda eńse tiktegen ózbek fýtbolshylary 60-mınýtta gol soqty. 22 jastaǵy О́zbekstannyń altyn aıdarly saqasy Abbosbek Faızýllaev álem chempıonatyndaǵy alǵashqy golyn enshisine jazdy. Qarshyǵadaı ǵana juqaltań jigit Kolýmbııa quramasynyń eńgezerdeı qorǵaýshylaryn kádimgideı sastyrdy. Eýropanyń eńseli klýbtarynda shyńdalǵan Eldor Shomýrodov bastaǵan ózge jigitter de jasyndaı jarqyldady.
65-mınýtta kolýmbııalyq jartylaı qorǵaýshy Lýıs Dıas enshisine gol jazyp, komandasyn alǵa shyǵardy. О́zbekstan quramasynyń oıynshylary qarymta shabýyldy óristetý taktıkasyna súıenip, dop aıyrmashylyǵyn qysqartýǵa baryn saldy. Bas tóreshi Entonı Teılor (Anglııa) ekinshi taımnyń negizgi ýaqytyna 8-mınýt qosty. 90+8 mınýtta alańǵa 72-mınýtta shyqqan Hamınton Kampas úshinshi goldy soǵyp etti. Match túgesiler tusta О́zbekstan quramasynyń qorǵaýshysy Behrýdjon Kárimovtyń alystan shirene tepken soqqysy Kolýmbııa quramasynyń qaqpasy mańdaıynan qaıtty.
Italııalyq maman Fabıo Kannavaro baptaıtyn О́zbekstan ulttyq quramasy ekinshi matchynda Portýgalııa quramasyna qarsy oınap, qarsylasynan upaı oljalaýǵa umtylady.
Beısenbiniń tańyna aýǵan mezgilde Tehas shtatyndaǵy Arlıngton qalasyndaǵy «Eı-Tı-end-Tı» stadıonynda «L» tobynyń 1-týry oıyny ótti. Anglııa quramasy Horvatııa fýtbolshylaryn 4:2 esebimen utty. Matchtyń 12-mınýtynda shabýylshy Garrı Keın penaltıden esep ashyp, aǵylshyndar alǵa ozdy. Horvattar da qarap qalmaı, 36-mınýtta jartylaı qorǵaýshy Martın Batýrına tarazy basyn teńestirdi. Birinshi taımnyń 42-mınýtynda Garrı Keın enshisine ekinshi golyn jazdy. 45+5-mınýtta Petar Musa esepti teńestirgenimen, ekinshi taımda horvatııalyqtardyń qorǵanysy syr berdi. 47-mınýtta Anglııa quramasynyń jartylaı qorǵaýshysy Djýd Bellıngem komandasyn alǵa shyǵarsa, 85-mınýtta Markýs Rashford nátıjeni 4:2-ge jetkizdi.
Bul toptaǵy ekinshi, Gana men Panama quramalary arasyndaǵy match Kanadanyń Toronto qalasyndaǵy «Bı-Em-O Fıld» stadıonynda ótti. Matchtyń negizgi ýaqytynda esep ashylmady, shvesııalyq bas qazy Glenn Nıýberg 5 mınýt qosqan edi. Kaleb Iırenkı 90+5-mınýtta enshisine gol jazyp, ganalyqtar 3 upaı oljalady.