Uly Otan soǵysynyń ardagerlerine barynsha qurmet kórsetý, qandy qyrǵynnan qaıtpaı qalǵan maıdangerlerdiń rýhyn asqaqtatý maqsatynda eldi mekenderde eńseli eskertkishter turǵyzý tárizdi kóptegen kelisti kórinister keńinen qolǵa alynýda. Sondaı saltanatty is-sharalardyń qataryna Almaty oblysynyń Jambyl aýdanynda ótken Uly Otan soǵysy jáne eńbek ardageri Shaıahmet Ǵaınanovtyń týǵanyna 101 jyl tolý sátine oraılastyrylyp ótkizilgen jasóspirimder arasyndaǵy dástúrli boks týrnıri qosyldy.
Shaıahmet Ǵaınanovty eske alýǵa arnalǵan jasóspirimder arasyndaǵy bıylǵy VI boks týrnırine Qazaqstannan ózge Qyrǵyzstan men О́zbekstan respýblıkalary da tańdaýly bylǵary qolǵap sheberlerin attandyrypty. Talaı-talaı jekpe-jekterdiń dámin tatyp, sheberlik jaǵynan da, namys jaǵynan da sharshy alańda shynaıy shyńdalǵan qazaqstandyq boksshylardyń quramyn quraıtyn komandalardyń sapynda Qyzylorda, Ońtústik Qazaqstan, Jambyl oblystarynyń, sondaı-aq, Almaty oblysynyń Alakól, Raıymbek, Ile, Talǵar, Eńbekshiqazaq, Qarasaı, Jambyl aýdandarynyń jáne Almaty qalasynyń boksshy sportshylary boldy.
Jankúıerler men kórermenderdiń mol bolýyna baılanysty aýyl mektebiniń ashyq aspan astyndaǵy aýlasyna qurylǵan boks rınginde tamasha oıyn órnekteri oryn alyp, ondaǵy tamasha jekpe-jekter dúrkin-dúrkin jınalǵandardyń rııasyz qoshemetterine bólenip jatty. Dodaly da dýmandy sáttiń eń qyzǵan kezinde qazaqtyń oıý-órnekpen kómkerilgen shapany men qalpaǵyn kıip, astyndaǵy qara tulpardyń júrisin oınaqshytyp, qalyń kópshiliktiń ortasyna 1980 jylǵy Máskeý Olımpıadasynyń chempıony Jaqsylyq Úshkempirovtiń kelýi – mundaǵylardyń delebesin qozdyryp, ol kisige degen qurmetten týyndaǵan jarys alańyndaǵy qazaqı qıqý aınalany kómkerip ketti.
Jarystyń nátıjesi shyǵyp, jeke jáne komandalyq eseptegi oryndar aıqyndalǵansha soǵys jáne eńbek ardageri Shaıahmet Ǵaınanovty eske alýǵa arnalǵan jasóspirimder arasyndaǵy VI halyqaralyq boks týrnıriniń aıaqtalýyna baılanysty qorytyndy sóz sóıleıtinderge kezek berilip, ortaǵa Máskeý Olımpıadasynyń chempıony Jaqsylyq Úshkempirov aǵamyz kóterildi. О́z sózinde qonaq ár jyldary ótken Olımpıadalarda Qazaqstannan shyqqan chempıondar týraly aıta kelip, 200-den asa memleket qatysqan London Olımpıadasynda Qazaqstannyń 7-shi orynǵa ıe bolǵandyǵyn úlken maqtanysh sezimmen jetkizdi. «Sol sportshylardyń dańqty nátıjelerin jańadan jańǵyrtyp, bolashaqta Qazaqstannyń sporttyq abyroıyn arttyratyn sendersińder, aınalaıyn jasóspirim bylǵary qolǵap sheberleri!» degen Jaqsylyq Úshkempirov qyrǵyz jáne ózbek elderinen kelgen sportshylarǵa da zor tabystar tiledi.
Odan keıin sóz kezegi berilgen Bilim jáne ǵylym mınıstrligi dene-shynyqtyrý ǵylymı-praktıkalyq ortalyǵynyń bas dırektory Marat Qoshaev, Almaty oblysyndaǵy Jambyl aýdandyq máslıhatynyń hatshysy Saıat Juryn, ál-Farabı atyndaǵy Qazaq ulttyq ýnıversıteti sport kesheniniń basshysy Talǵat Dúısenbaev osy ótkizilip otyrǵan halyqaralyq sporttyq básekeniń Uly Jeńistiń 70 jyldyǵyna jasalǵan úlken syı, jas urpaq tárbıesine bereri mol saıası shara ekendigine erekshe toqtalyp, baıandy bastamanyń qozǵaýshysy bolyp kele jatqan soǵys jáne eńbek ardageri Shaıahmet Ǵaınanovtyń perzenti, memleket jáne qoǵam qaıratkeri, general-leıtenant Ádil Shaıahmetovke degen rızashylyqtaryn bildirdi.
Búgingi sport dodasyn uıymdastyrý barysynda asqan belsendilik pen iskerlik tanytqan azamattarǵa arnaıy marapattardy tabystaý úshin halyq aldyna shyqqan Qazaqstan Jazýshylar odaǵynyń múshesi Manarbek Izbasar joǵaryda sóz alǵan qonaqtarmen birge Shaıahmet Ǵaınanovtyń urpaǵy Danııar Jantyqbaevtyń, Almaty oblysyndaǵy Jambyl aýdanynyń boks jattyqtyrýshysy Bekbolat Naǵashybaıdyń, ózbekstandyq jattyqtyrýshy Nurlan Qarajigitovtiń, qyrǵyzstandyq jattyqtyrýshy Nurbek О́mirǵazıevtiń, Qazaqstannyń eńbek sińirgen jattyqtyrýshysy Asqar Omarqulovtyń, Almaty oblysyndaǵy Kókózek orta mektebiniń dırektory Hamıt Esbaevtyń omyraýlaryna eskertkish medaldar men tósbelgilerdi taqty.
Osy kezde merekelik sport dodasynyń nátıjeleri de belgili bolyp, júldeger sportshylar salmaq kategorııalary boıynsha kezek-kezegimen tuǵyrǵa kóterilip, syı-sııapattarǵa ıe bolyp jatty. Al, jalpy komandalyq esep boıynsha Almaty oblysyndaǵy Jambyl aýdanynyń qurama komandasy birinshi orynǵa kóterilse, ekinshi oryn О́zbekstan qurama komandasynyń enshisine buıyrdy. Jeńis tuǵyrynyń úshinshi satysyna Almaty qalasynyń bylǵary qolǵap sheberleri laıyq dep tabyldy.
Aınash ESALI, «Egemen Qazaqstan».
Almaty oblysy, Jambyl aýdany.