Keshe Batys Qazaqstan oblystyq Qazaqstan halqy Assambleıasy hatshylyǵy uıymdastyrǵan dóńgelek ústel bıylǵy 26 sáýirde ótetin prezıdenttik saılaýdyń basty máni men mańyzyn arqaý etti. Jáńgir han atyndaǵy Batys Qazaqstan agrarlyq-tehnıkalyq ýnıversıtetinde «Daǵdarysqa qarsy saıasat jáne bıylǵy prezıdenttik saılaýdyń mańyzy» degen taqyrypta óristegen oı-pikirler toǵysyna óńir ǵalymdary men stýdentter, Qazaqstan halqy Assambleıasy jastar qanatynyń músheleri, kásipkerler men Azamattyq alıans ókilderi qatysty.
Dóńgelek ústel májilisi ústinde bas qosqandar Elbasy buǵan deıin shegelep, belgilep bergen daǵdarysqa qarsy saıasattyń tıimdiligi men Qazaqstan qoǵamyna ıkemdiligi jóninde jan-jaqty áńgimeler óristetti. Sondaı-aq, olar álemdik qarjy-ekonomıkalyq daǵdarystyń qýatty tolqyndary soqqanyna qaramastan, búgingi kúni elimizde jan-jaqty oılastyrylǵan daǵdarysqa qarsy is-qımyldardyń nátıjesinde onyń áseri men zardaby aıtarlyqtaı baıqalyp otyrmaǵany jóninde tııanaqty tujyrymdar jasady. Osyndaı oıly oramnyń biri Batys Qazaqstan oblystyq kásipkerler palatasynyń tóraǵasy Keńes Ábsatırovtyń tarapynan aıtyldy.
Basqosý kezinde Jáńgir han atyndaǵy Batys Qazaqstan argarlyq-tehnıkalyq ýnıversıtetiniń úshinshi kýrs stýdenti, Prezıdenttik shákirtaqy ıegeri Áıgerim Erlanova men «Dostyq» klýbynyń múshesi Kırıll Denısov prezıdenttik saılaý ótkizý merzimi búgingi álemdegi kúrdeli kezeńniń ereksheligine oraı erte de emes, kesh te emes, dál óz ýaqytynda belgilengenin aıta kelip, batysqazaqstandyq stýdentter men jastar atynan Elbasynyń bıylǵy saılaýǵa túsýge kelisim berýin jaqtaıtyndaryn jetkizdi.
Sondaı-aq, ekonomıka ǵylymdarynyń doktory, professor Raýshan Ǵabdýalıevanyń pikirinshe, Elbasy belgilep bergen daǵdarysqa qarsy saıasat bıylǵy prezıdenttik saılaýdyń qajettiligi men mańyzdylyǵyn kótere túsedi. Ári oǵan jańasha mazmun men túr beredi. Bul eki uǵymdardyń arasynda turǵan «Qytaı qorǵany» joq. Ekeýi bir-birimen úndes, sabaqtas. Ári birin-biri baıytyp, tolyqtyryp tura alady. Mundaı oıly pikirdi dóńgelek ústeldiń ózge qatysýshylary da qoldady.
Temir QUSAIYN,
«Egemen Qazaqstan».
ORAL.